अखिल नेपाल फुटबल संघ (एन्फा)को अध्यक्ष अध्यक्ष र उपाध्यक्ष चयनका लागि सोमबार निर्वाचन हुँदै छ । एन्फाले निर्वाचनको सम्पूर्ण तयारी पूरा भएको जनाएको छ ।

काठमाडौंको बबरमहलस्थित कार्की पार्टी प्यालेसमा सोमबार बिहान ८ बजेदेखि शुरु हुने साधारणसभामा मतदान भने दिउँसो ३ बजेदेखि साँझ ५ बजेसम्म हुने निर्वाचन समितिले जनाएको छ ।

अध्यक्षका लागि हालका कार्यबाहक अध्यक्ष नरेन्द्र श्रेष्ठ र हालका उपाध्यक्ष कर्माछिरिङ शेर्पाबीच प्रतिस्पर्धा हुँदैछ ।

उपाध्यक्षका लागि मणि कुँवर, दीपक खाती र उपेन्द्रमान सिंहको उम्मेदवारी परेको छ । सबै उम्मेदवारले जित्ने दाबी गरिरहेका छन् ।

एक वर्षका लागि हुने नेतृत्वको चुनावमा ६७ प्रतिनिधिले मतदान गर्नेछन् । ६९ प्रतिनिधि भएकामा ‘बी’ डिभिजन लिगबाट मताधिकार पाएको कुमारी क्लब दुई वर्षे कारबाहीमा परेको र झापा जिल्लाबाट प्रतिनिधि चयन समयभन्दा ढिला भएकाले सहभागी नहुने जनाइएको छ ।