काठमाडौंको नक्सालस्थित प्रहरी प्रधान कार्यालयनजिक रहेको एउटा होटलमा जुवा खेलिरहेका १६ जना जुवाडे पक्राउ परेका छन् ।

महानगरीय प्रहरी वृत्त कमलपोखरीले नक्साल भगवती बहालमा रहेको होटल गणपतीमा छापा मारेर जुवाडेहरुलाई पक्राउ गरेको हो । प्रहरीले ठूलो परिमाणमा रकमसमेत बरामद गरेको छ ।

होटल गणपतीको एउटा कोठामा जुवा खेलीरहेको अवस्थामा दुई महिलासहित १६ जना पक्राउ परेका हुन् । ब्यवसायीक रुपमा काठमाडौं उपत्यकाका विभिन्न भाग र उपत्यका बाहिरबाट आएका ब्यक्तिसमेत खालबाटै पक्राउ परेका हुन् । पक्राउ पर्नेमा ओम श्रेष्ठ, राजकुमार अधिकारी, जितेन्द्र गजुरेल, कुमार तामाङ, बाबुराम लामा, कृष्ण बस्नेत, दीपक राई, भाई महर्जन, राज तामाङ,फुर्वा लामा, अजय लामा, दिनेश खत्री, बिरु लामा र दिलिप लामा रहेका छन् । त्यसैगरी पक्राउ पर्ने महिलामा कमलासिंह ठकुरी र पूर्णिमा थापा छन् ।

जुवा खालमा सुनका गरगहनासमेत बरामद भएको प्रहरीले जनाएको छ । प्रहरी टोलीले २५ लाख ६४ हजार र कौडा १६ थान समेत घटनास्थलबाट बरामद गरेको छ । पक्राउ परेका जुवाडे बिरुद्ध जुवा ऐनअनुसार कारवाही अघि बढाएको प्रहरीले जनाएको छ ।