अमेरिकी राष्ट्रपति बाराक ओबामाको पटकपटक अनुरोधमा उत्तर कोरियाली नेता किम जोङ–उनले उहाँको मुलुकमा फौजदारी अभियोगमा हिरासतमा रहेका अमेरिकी नागरिक जेफ्री फावललाई रिहा गर्न आदेश दिनुभएको प्योङयाङले बुधबार दाबी गरेको छ । उत्तर कोरियाको सरकारी समाचार संस्था केसीएनएले ५६ वर्षीय फावललाई कानुनी प्रक्रिया अनुसार अमेरिकी अधिकारीहरुलाई हस्तान्तरण गरिएको जानकारी दिएको छ । उत्तर कोरियामा हिरासतमा रहेका तीन व्यक्तिमध्ये फावल एक हुन् । उनलाई मङ्गलबार रिहा गरिएको हो र प्योङयाङ आइपुगेको अमेरिकी सरकारको एक विमानमा उनलाई जान अनुमति दिइयो । फावल अप्रिल महिनामा उत्तर कोरिया प्रवेश गरेका हुन् र उनलाई उत्तरी चोङजिन बन्दरगाहमा एक रात्रिक्लबको स्नानागारमा बाइबल छोडेको आरोपमा पक्राउ गरिएको थियो । उत्तर कोरियामा अनुमति प्राप्त नभएको धर्मिक कार्यलाई फौजदारी अपराधको रुपमा लिइन्छ । अमेरिकी विदेश मन्त्रालयले फावलको रिहाइको घोषणा गरेको थियो तर उनलाई कसरी रिहा गरियो भन्ने विषयमा जानकारी दिइएको थिएन । हाल अन्य दुई अमेरिकी नागरिक म्याथ्यु मिलर तथा केनेथ बीलाई कोरियामा कडाश्रमयुक्त काराबासमा राखिएको थियो । वासिङ्टनले यस्ता व्यक्तिलाई उत्तर कोरियाले राजनीतिक बन्धकको रुपमा प्रयोग गरेको आरोप लगाउँदै उनीहरुलाई तत्कालै रिहा गर्न आग्रह गरेको छ । अमेरिकाले यी बन्धकलाई रिहा गर्न आफ्नो दूत पठाउन गरेको आग्रहलाई प्योङयाङले निरन्तर रुपमा अस्वीकार गरेको छ । फावललाई मुलुकबाट बाहिर लैजान वासिङ्टनलाई प्योङयाङले समयसीमा दिएको र पेन्टागनले उनलाई फर्काउन विमान पठाउने निर्णय गरेको अमेरिकी अधिकारीहरुले जानकारी दिए । अमेरिकाको उत्तर कोरियासँग कूटनीतिक सम्बन्ध छैन । अमेरिकी विदेश मन्त्रालयले मिलर तथा बीलाई मुक्त गर्न निरन्तर काम गर्ने र आफ्ना दूत रोबर्ट किङ्लाई यस विषयमा छलफल गर्न उत्तर कोरिया पठाउने प्रस्ताव राखेको छ । चौबीस वर्षीय मिलरलाई अध्यागमनमा प्रवेशाज्ञा च्यातेको भनी अप्रिल महिनामा पक्राउ गरिएको थियो । उनलाई सेप्टेम्बर महिनामा छ वर्षको कडाश्रम युक्त काराबासको सजाय तोकिएको थियो । बयालीस वर्षीय बीलाई सन् २०१२ मा उत्तर कोरियाको शासन उल्टाउने मनसाय राखेको भनी पक्राउ गरिएको थियो र उनी हाल १५ वर्षको काराबासमा रहेका छन् ।