गत सोमबार सिड्नीको मरुब्रा तटीय क्षेत्रमा डुबेर ज्यान गुमाएकी नेपाली विद्यार्थी श्रृष्टि भण्डारीको शव नेपाल लैजानका लागि सहयोग संकलन सुरु गरिएको छ । गो फन्डमी मार्फत १० हजार डलरका लागि आह्वान गरिएको सहयोगमा अहिलेसम्म ५ हजारभन्दा बढी सहयोग राशी जम्मा भइसकेको छ । मृतक भण्डारीकी आफन्त प्रतिष्ठा केसीले भण्डारीकी बुबाआमा र आफन्त भिसा प्रक्रिया र अन्य कारणबाट तत्कालै यहाँ आउन नसक्ने भएपछि छोरीको शव नेपाल पठाइदिन अनुरोध गरे अनुसार सहयोग संकलन गरी नेपाल पठाउन लागिएको हो । मंगलबार उनका दुई आफन्तले सिड्नीको शवगृहमा राखिएको शवलाई उनको नै हो भनी सनाखत गरेका थिए । प्रतिष्ठाले फेयरफक्स न्यूज मिडियालाई बताए अनुसार, यो घटनाबाट नेपालमा परिवारजन शोकमा डुबेका छन् । क्यानबेरामा रहेको नेपाली दूतावास र गैरआवासीय नेपाली संघले पनि यस घटनामा सहयोग पुर्याइरहेका छन् र नेपाल शव पठाउनका लागि आइपर्ने सहयोग गर्ने बताइसकेका छन् । मात्र १३ दिन अघि फेब्रुअरी १ तारिखका दिन सिड्नी आएकी उनी फेब्रअरी १३ तारिखका दिन मरुब्रा तटमा पुगेकी थिइन् । प्रहरीले घटना शंकास्पद नरहेको जनाएको छ । यसैबीच, उक्त घटनामा श्रृष्टिसँगै मरुब्रा गएका सुदिप उप्रेतीको खोजी कार्य जारी रहेपनि कुनै सफलता मिलेको छैन ।
यदि तपाईं पनि श्रृष्टिको शव नेपाल पठाउन सहयोग गर्न चाहनुहुन्छ भने गो फन्डको तल दिइएको फोटोको लिंकमा क्लीक गरेर सहयोग गर्न सक्नुहुनेछ ।