अष्ट्रेलियाको भिक्टोरिया राज्यमा बसोबास गर्ने नेपालीहरुको संस्था नेप्लीज एशोसिएसन अफ भिक्टोरियाले आगामी अप्रिल १४ देखि १६ सम्म मल्टिकल्चरल क्रिकेटको आयोजना गर्ने भएको छ । नेपालीसहित अन्य विभिन्न समूदायकाबीचमा हुने क्रिकेट प्रतियोगिताको फाईनलको दिन अष्ट्रेलियन महिला क्रिकेट टोलीकी पूर्वकप्तान जोडी फिल्ड्स पनि खेलाडीहरुलाई हौसला दिन खेलस्थलमा उपस्थित हुने भएकी छिन् । कुनैपनि नेपाली संस्थाले आयोजना गरेको क्रिकेट प्रतियोगितामा यो स्तरको सहभागिता भएको पहिलो पटक हो । उनी अप्रिल १६ तारिखको फाईनल प्रतियोगिताको बेला विहान १० बजदेखि २ बजेसम्म खेल मैदानमा रहनेछिन् । क्वीन्सल्याण्डमा जन्मेकी फिल्डस अष्ट्रेलियाको राष्ट्यि टोलीको नेतृत्व गर्ने उक्त राज्यको पहिलो हुन् । न्याभका सचिव नोर्गेन नोर्बुले बहुसांस्कृतिक क्रिकेट प्रतियोगिता अप्रिल १४ तारिख शुक्रबार विहान ९ बजेदेखि टीडब्लू ब्लेक पार्क प्रेस्टनमा हुने जानकारी दिँदै नेपाली खेलाडीहरुको उत्साह बृद्धिका लागि उपस्थित भइदिन आग्रह गरेका छन् । प्रतियोगिताका संयोजक एवं न्याभका उपाध्यक्ष तारा गैरेले नेपाली टिमका साथै पाकिस्तानी टिम हक्स क्रिकेट क्लब, श्रीलंकन टिम नर्दन लायन्स, भुटानी क्रिकेट टिम, बंगलादेशी क्रिकेट टिम बंगाल टाईगर्स र भारतीय टिम शक्ति लायन्स सहभागी हुने जानकारी गराए । फाईनलका दिन नेपाली नयाँ वर्षको रमझमका साथ उत्सवकै रुपमा बहुसांस्कृतिक क्रिकेट प्रतियोगितामा रमाइलो गर्ने तयारी भएको गैरेको भनाई छ । न्याभका अध्यक्ष डा. अनुपम पोखरेलले पनि नेपाली खेलाडीको उत्साह बढाउनका साथै बहुसांस्कृतिक भिक्टोरियाको समाजमा आफ्नो उपस्थितिलाई मजबुत रुपमा प्रस्तुत गर्न मेलबर्नमा रहेका सबै नेपालीलाई आह्वान गरेका छन् ।