बिहीबार राति ८ बजे धापासीस्थित आलोक नेम्वांगको अपार्टमेन्टमा उनको शव झुण्डिएको अवस्थामा भेटेपछि आफन्तजनले प्रहरीलाई खबर गरेका थिए। उनलाई अस्पताल लगेपनि मृत घोषित उनको ज्यान गइसकेको थियो। शिक्षण अस्पतालमा राति पोष्टमार्टम नभएकोले आज बिहान मात्रै पोष्टमार्टम गर्ने बताइएको छ। सानो संसार नामक चलचित्र निर्देशन समेत गरेका निर्देशक आलोक नेम्वांग पछिल्लो समय केही म्युजिक भिडियो बनाउन व्यस्त थिए। नेपाली काँचको पर्दामा सफलतम म्युजिक भिडियो निर्देशकको सूचिमा नेम्वांग अग्रपंक्तिमा थिए। उनको आत्महत्याको कारण खुलेको छैन तर नजिकै सुसाईड नोट पनि फेला परेकोले यसबाट सबै कुरा खुल्ने प्रहरीले जनाएको छ। सुसाईड नोटमा के लेखिएको छ यस बारेमा प्रहरीले अहिले जानकारी दिन नमिल्ने जनाएको छ। उनले निर्देशन गरेको चलचित्र अझैपनि फागुनमा रिलिज हुने तयारीमा थियो। अमेरिकामा म्युजिक, कोरियोग्राफीको अध्ययन गरेर आएका नेम्वांगले सफलतम हिट म्युजिक भिडियो दिएका छन्।