प्रतिनिधिसभा र प्रदेशसभा सदस्य निर्वाचनमा सहभागी उम्मेदवारलाई लक्षित गरेर बम आक्रमण हुन थालेपछि उदयपुर जिल्ला प्रशासन कार्यालयले सुरक्षा व्यवस्था कडा बनाएको छ । अज्ञात समूहले उम्मेदवार भोट माग्न हिड्ँने बाटोमा ढुकेर तथा उम्मेदवारको घरमा समेत बम विस्फोट गराउन थालेपछि सुरक्षा व्यवस्था कडा बनाइएको उदयपुरका प्रमुख जिल्ला अधिकारी चन्द्रमान श्रेष्ठले बताउनुभयो । उम्मेदवार तथा मतदातालाई लक्षित गरेर विस्फोटका घटना बढेपछि जिल्लामा सुरक्षाकर्मीको संख्यामा वृद्धि गरिएको र सुरक्षा चेकजाँचलाई बढाइएको उहाँले बताउनभुयो । उम्मेदवारहरुले मागेअनुसार सुरक्षा उपलब्ध गराइएको र चौबीसै घण्टा उम्मेदवारको अघिपछि सुरक्षाकर्मी परिचालन गरिएको उहाँको भनाइ थियो । जिल्लाका मुख्य नाका र शंकास्पद स्थानमा चौबीसै घण्टा प्रहरी परिचालन गरिएको र प्रभावकारी रुपमा सुरक्षा प्रबन्ध गरिएको उदयपुरका प्रहरी प्रमुख प्रहरी उपरीक्षक नवराज भट्टले बताउनुभयो । मंगलबार जिल्लाका विभिन्न स्थानमा उम्मेदवारमाथि बम प्रहार गर्नेमध्ये थप दुई जनालाई पक्राउ गरिएको उहाँले बताउनुभयो । एक साता अघि मात्र उदयपुर गढी गाउँपालिकाको नरेटारमा वाम गठबन्धनका उम्मेदवारलाई लक्षित गरेर बम प्रहार भएको थियो । त्यस्तै मंगलबार बिहान नेपाली काँग्रेस उदयपुरका पूर्वसभापति तथा उदयपुर क्षेत्र नं १ को (ख) का उम्मेदवार हिमाल कार्कीको त्रियुगा नगरपालिका–७ भण्टाबारीस्थित घरमा नै बम आक्रमण भएको थियो । मंगलबार नै काँग्रेसका केन्द्रीय सदस्य तथा पूर्वशहरी विकासमन्त्री एवं क्षेत्र नं १ का उम्मेदवार डा नारायण खड्कालाई लक्षित गरेर त्रियुगा नगरपालिका– १० बाबरीमा बम आक्रमण भएको थियो ।