भारतीय प्रधानमन्त्री नरेन्द्र मोदीले आफ्नो नियमित कार्यतालिकाभन्दा बाहिर पछि तयारी गरिएको सिड्नी सम्बोधनका निम्ति सम्पूर्ण तयारी पूरा भएको आयोजकले जानकारी दिएका छन् । अलफोन्स अरिनामा आगामी सोमबार आयोजना गरिने सांस्कृतिक कार्यक्रमसहितको मोदी सम्बोधन कार्यक्रमको विभिन्न टेलिभिजन च्यानलहरुले प्रत्यक्ष प्रशारण गर्ने जानकारी पनि पत्रकार सम्मेलन गराइएको छ । नेपालसहित पाकिस्तान, बंगलादेशका विभिन्न सामूदायिक संस्थाहरु समेत सहभागी बनेको यस कार्यक्रममा मोदीले साँझ ६ः३० बजेबाट सम्बोधन गर्ने बताइएको छ । मुख्यतः मोदीले यस पटकको आफ्नो सम्बोधनमा अष्ट्रेलियामा भारतीय संस्कृति प्रचार संस्था खोल्ने तथा हिन्दी भाषाको प्रचारका निम्ति के गर्न सकिन्छ भन्ने विषयमा पनि प्रकाश पार्नुहुनेछ । २८ वर्षपछि कुनै भारतीय प्रधानमन्त्रीले अष्ट्रेलियामा भ्रमण गर्न लागेको यो अवसरमा विश्वमञ्चकै एक सशक्त नेताका रुपमा मोदीलाई स्थापित गर्न सिड्नी सम्बोधन फलदायी हुने विश्वास आयोजकको छ । रोचक कुरा त के छ भने, सिड्नीमा अहिलेसम्म कुनै विदेशी नेताको निम्ति यस किसिमको सम्बोधनको व्यवस्था भएको थिएन जहाँ १६ हजारभन्दा बढी दर्शकहरु उपस्थित हुनेछन् र उनको सम्बोधन विश्वका विभिन्न देशमा हेरिनेछ । मोदी मेलबर्नबाट सिड्नीसम्म विशेष ट्रेनमा आउने जसलाई मोदी एक्सप्रेस नामाकरण गरिनेछ । ट्रेनमा भारतीय सांस्कृतिक प्रस्तुतिका साथै विभिन्न गुजराती परिकार पनि पस्कने तयारी भएको छ । यस ट्रेनमा २ सय जना मोदी प्रशंसक मेलबर्नवासी पनि सँगै आउनेछन् जो सिड्नी सम्बोधनमा सहभागी बन्नेछन् । पत्रकार सम्मेलनमा दिइएको जानकारी अनुसार त्यही दिन नै जपानका प्रधानमन्त्री पनि सिड्नीमै हुनेछन् तर उनको भ्रमणलाई लिएर यस्तो उत्साह छैन । मोदीलाई सुन्नका निम्ति ठूलो संख्यामा सिड्नी लगायत अन्य राज्यमा रहेका भारतीयहरु उत्साही देखिएका छन् । अष्ट्रेलियाका सबै राज्यबाट त्यस दिन मोदीको भाषण सुन्नका निम्ति उपस्थिति रहनेछ । साथै, मोदीको स्वागतका निम्ति अष्ट्रेलियाका आदिवासी एबोर्जिनोहरुले पनि विशेष तयारी गरेका छन् । स्टेडियममा आउन चाहने दर्शकको निम्ति सिट उपलब्ध गराउन नसकेपछि आयोजकहरुले अलफोन्स अरिनाको बाहिर पनि ठूला स्क्रिनहरु राख्ने व्यवस्था मिलाएको जनाएका छन् । साँझ ४ः३० बजेदेखि नै कार्यक्रम हुने भएपनि सुरक्षाको जाँचका निम्ति लामो समय लाग्नेहुनाले त्यसै अनुसार तयारी गरेर आउन पनि आयोजकले आग्रह गरेका छन् ।

यो पनि पढ्नुहोस्

http://mntv.com.au/portal/?p=3244