संवैधानिक राजनीतिक संवाद तथा सहमति समितिको बैठक स्थगन भए पनि सभापति डा बाबुराम भट्टराईले संविधान निर्माणमा देखिएका विवादित विषयमा सहमति जुटाउन आज पनि अनौपचारिक परामर्श जारी राख्नुभएको छ । औपचारिक बैठक पनि आजै बस्दैछ । प्रधानमन्त्री तथा नेपाली काँग्रेसका सभापति सुशील कोइराला, नेकपा(एमाले)का अध्यक्ष केपी शर्मा ओली र एकीकृत नेकपा(माओवादी)का अध्यक्ष पुष्पकमल दाहालसँग भट्टराईले पटक पटक टेलिफोनमा परामर्श गर्नुभएको थियो । समितिको बैठकअघि काँग्रेस र एमाओवादीबीच प्रधानमन्त्री निवास बालुवाटार तथा एमाले र एमाओवादीबीच राज्यव्यवस्था समितिको बैठक कक्ष सिंहदरबारमा द्विपक्षीय वार्ता हुने कार्यसूचीसमेत तय गरिएको छ । बुधबार डा भट्टराईको स्वास्थ्यमा समस्या देखिएको भन्दै संवाद समितिको बैठक स्थगन गरिएको थियो । समितिको बैठक स्थगन भए पनि विभिन्न तहमा अनौपचारिक संवादलाई भने जारी राखिएको थियो । यसैबीच सभापति डा भट्टराईले धेसी जनअधिकार फोरम नेपाल (लोकतान्त्रिक)का अध्यक्ष विजयकुमार गच्छदारस“ग संविधान निर्माणका विषयमा परामर्श गर्नुभएको छ । विगतका आन्दोलनका उपलब्धिको रक्षा गर्ने गरी सहमतिकै आधारमा संविधान निर्माण गर्न अन्तिमसम्म पनि प्रयत्न गर्नुपर्छ भन्नेमा नै परामर्शमा जोड दिइएको थियो । परामर्श कुन विषयमा भयो भन्ने जिज्ञासामा सभापति डा भट्टराईले भन्नुभयो, “विगतका मधेस आन्दोलन, जनयुद्ध र जनआन्दोलनका उपलब्धिलाई रक्षा गर्दै सहमति र सम्झौताकै आधारमा संविधान बनाएर जानु उपयुक्त हुन्छ भन्नेमा नै केन्द्रित रह्यो ।” संवाद समितिको बैठकमा विवादित विषमया सहमति खोज्नाको साटो प्रमुख दलका नेता ‘टसको मस’ नभएपछि सहमति जुट्न सकेको छैन । संवाद समितिको बैठक चलिरहेका बेला एमाओवादी अध्यक्ष दाहाल रोल्पा भ्रमणमा निस्कनुभएको भन्दै काँग्रेस र एमालेले आपत्ति जनाएका छन् । द्विपक्षीय रुपमा छलफल गरेर मात्रै संवाद समितिको बैठक बोलाउने ध्येयका साथ शुक्रबार बैठकको आयोजना गरिएको छ । उक्त बैठकमा विवादित विषयमा सहमति खोज्ने प्रयत्न गरिनेछ । यता सहमति खोज्नाको साटो संवाद समितिमा पेस गरिएको प्रस्ताव अन्तर्राष्ट्रिय समुदायका प्रतिनिधिलाई बोलाएर वितरण गरिएकामा एमाओवादीले आपत्ति प्रकट गरेको छ ।