नेपालबाट सार्क क्षेत्रबाहेकका देशमा जाँदा १५ सय डलरको मात्र सटही सुविधा प्राप्त गर्ने नयाँ नियम राष्ट्र बैंकले लागू गरेको छ । वाणिज्य बैंकहरुलाई एक परिपत्र जारी गर्दै राष्ट्र बैंकले यस्तो नियम लगाएको हो । यसअघि २५ सय डलर सटही सुविधा रहेकोमा अब यो १५ सयमा झारिएको छ । राष्ट्र बैंकले जारी गरेको परित्रमा भारतबाहेक अन्य मुलुकमा भ्रमणमा जाने नेपाली नागरिकलाई एक पटकमा १५ सय अमेरिकी डलर वा सो बराबर विदेशी मुद्रा सटही सुविधा दिइनेछ । यस्तै स्थलमार्गबाट तिब्बत वा भारत बाहेकका अन्य देशमा जाँदा ५ सय डलर वा सो बराबरको विदेशी मुद्रा साट्न पाइनेछ । यो नियम निजी भ्रमणमा जाँदा मात्रै लागू गरिएको हो । सरकारी स्वीकृतिका भ्रमणहरुमा यस्तो दायरा लागू हुने छैन भने अध्ययनका लागि विदेश जानेहरुको हकमा शिक्षा मन्त्रालय र राष्ट्र बैंकको स्वीकृतिमा विदेशी मुद्रा पठाउन पाइनेछ ।