नाइजेरियाको उत्तरपूर्वी सीमावर्ती नगरको एक भीडयुक्त बजारमा व्यापारीका रूपमा आएका बोका हराम बन्दुकधारीले सोमबार जथाभावी गोली चलाएको जानकारी सैनिक अधिकारी तथा स्थानीय अधिकारीले दिएका छन् । उक्त घटनाका विषयमा जानकारी भएका एक वरिष्ठ अधिकारीले उक्त घटनामा मर्ने व्यक्तिको सङ्ख्या यकिन भन्न नसकिने बताए । ती बन्दुकधारीहरूले स्थानीय समयअनुसार बिहानको ११ः०० बजे गोली प्रहार गर्न थालेको बताइएको छ । नाइजरसँगको सीमानजिकै बोर्नो राज्यको दामासाकमा एक बजारमा व्यापारीको रूपमा आएका आतङ्कवादीहरूले अन्य व्यापारीमाथि गोली प्रहार गर्न थालेको ती अधिकारीले बताए । स्थानीय प्रशासनसँग काम गर्ने मोहम्मद दामासाकले आतङ्कवादीले आफ्नो हतियार बाकसमा लुकाएको र बजारमा ल्याएको जानकारी दिए । दामासाकले आतङ्कवादी व्यापारीको रूपमा आएको र आतङ्क मचाएको बताए । उनले धेरै व्यापारी घाउ लिँदै भाग्दै गरेको देखिएको र धेरै लड्दै बजारमै मर्दै गरेको पनि देखिएको बताए ।  बोको हरामले नाइजेरियाको उत्तरी भागमा कडा इस्लामिक राज्य स्थापना गर्न प्रयास गरिरहेको छ । यस समूहले साताको अत्यमा दोरोन बागा नगरमा यस्तै प्रकारको आक्रमण गरेको र त्यसमा ४८ व्यक्तिको मृत्यु भएको जानकारी दिइएको छ । हाल बोको हरामले आफूलाई आफ्नो नियन्त्रणमा लिइएको क्षेत्रमा विद्रोही सरकारको रूपमा स्थापना गर्ने र त्यहाँका जनतालाई उनीहरू आफ्नो इस्लामी राजमा शान्तिपूर्ण रूपमा बाँच्न पाउने भनी आश्वस्त पार्न खोजिरहेको देखिएको छ । यसैले निरन्तर रूपमा हिंसाग्रस्त यस क्षेत्रमा हाल हिंसामा केही कमी आएको देखिएको छ । विशेषज्ञहरूले यस लडाकू समूहमाथि सैनिक दबाब पर्न थालेपछि उनीहरूले मानवहत्या गर्ने आफ्नो काम पुनः निरन्तर राख्ने बताएका छन् । बोको हराम विद्रोहका कारण यस मुलुकमा सन् २००९ देखि हालसम्म १३ हजार व्यक्तिको मृत्यु भइसकेको छ ।