गोरखा जिल्ला स्थायी घर भई अष्ट्रेलियाका विभिन्न शहरमा बसोबास गर्ने नेपालीहरु मिलेर गोरखा समाज अष्ट्रेलियाको निर्माण गर्ने योजना बनाएका छन् । यसका लागि प्रकाश बस्ताकोटीको संयोजकत्वा एक तदर्थ समिति निर्माण गरिएको छ । सिड्नीको एसफिल्ड पार्कमा गोर्खालीहरुको भेलाले यो समिति निर्माण गरेको हो । समितिका सदस्यहरुमा शिव बञ्जारा, सञ्जित श्रेष्ठ, ईश्वर दाहाल र ध्रुव पोखरेल रहनुभएको छ । यस्तै अन्य सदस्यहरुमा आनन्द श्रेष्ठ, कृष्ण भट्टराई, जयबाबु श्रेष्ठ, अमर श्रेष्ठ, सुरेन्द्र दबाडी, राजु पोखरेल, निरज जोशी, अनिल पाण्डे र आशिष श्रेष्ठ रहनुभएको छ । राजनीतिबाट मुक्त रही आपसी सद्भाव, भाइचारा र एक अर्कालाई पर्नसक्ने सहयोगको माध्यम बन्ने लक्ष्य समाजले लिएको संयोजक प्रकाश बस्ताकोटीले जानकारी दिनुभयो । समाजले आगामी डिसेम्बर ६ तारिखका दिन साँझ ६ बजे एसफिल्ड पार्कमा नै अर्को भेलाको आयोजना गरेर दीर्घकालीन रणनीति निर्माण गर्दै अघि बढ्ने जानकारी पनि उहाँले दिनुभएको छ । स्मरणीय छ, मृत मुटुको प्रत्यारोपण गरेर विश्वभर चर्चित बन्नुभएका अष्ट्रेलिया निवासी डा. कुमुद धिताल पनि गोरखा जिल्लाकै बासिन्दा हुनुहुन्छ ।