नेपाली काँग्रेसका सभासद् हरिबहादुर खडकाको उपचारका  क्रममा आइतबार  साँझ निधन भएको छ । सभासद् खडका गत बुधबार बागलुङमा बलेवा क्याम्पसले आयोजना गर्न लागेको महायज्ञ उद्घाटन कार्यक्रममा सहभागी हुन जाने क्रममा जिप दुर्घटनामा परी गम्भीर घाइते हुनु भएको थियो  । घाइते भएपछि उहाँलाई हेलिकोप्टरबाट पोखरा र त्यसपछि हवाइजहाजबाट काठमाडौँ ल्याइएको थियो । राजधानीको बाँसबारीस्थित न्यूरो अस्पतालमा उपचारका क्रममा मृत्यु भएको उहाँका आफन्त मोतीबहादुर कुँवरले राससलाई जानकारी दिनुभयो । स्वर्गीय सभासद् खडकाको भोलि बिहान शव परीक्षण गरिसकेपछि श्रद्धाञ्जलिका लागि काँग्रेस केन्द्रीय कार्यालय सानेपा राखिने र त्यसपछि दाहसंस्कारका लागि गृह जिल्ला बागलुङ लगिने कुँवरले बताउनुभयो ।  बागलुङ क्षेत्र नं. १ का प्रत्यक्षतर्फबाट विजयी हुनु भएका सभासद् खडकाका दुई छोरा एक श्रीमती हुनुहुन्छ ।