भारतमा रही विभिन्न ईन्टरनेट कल मार्फत अष्ट्रेलियाका नागरिकहरुलाई ठगी गर्ने गिरोहको एक सदस्यका रुपमा अष्ट्रेलियन मिडियामार्फत चित्रण गरिएका प्रविन मैनाली १८ महिनाका लागि जेल चलान भएका छन् । २० वर्षका उनी आईटी पढ्नका लागि यहाँ आएको अष्ट्रेलियन सञ्चारमाध्यमले जनाएका छन् । गत मार्चमा निजले क्यासल हिलमा रहेको एक रिटायर्मेन्ट भिलेजमा एक बृद्धको क्रेडिट कार्ड मर्मत गरिदिने भन्दै त्यसबाट रकम आफ्नो एकाउन्टमा ट्रान्सफर गरेका थिए । चार जना पीडितको २१ पटक गरी १८ हजार ५ सय अष्ट्रेलियन डलर निजले आफ्नो खातामा ट्रान्सफर गरेका थिए । अष्ट्रेलियामा १२ महिनाभन्दा बढीको जेल सजाय हुने अपराधमा सजाय पाउने विदेशीहरुलाई जेल सजायपछि देश निकाला गर्ने प्रावधान छ ।
प्रहरीले गरेको अनुसन्धानमा निजले भारतमा रहेका व्यक्तिहरुको लागि यस्तो काम गर्नेगरेको र केही रकम आफु राखी बाँकी उतै पठाउने गरेको समेत खुलेको हो । मैनालीका विषयमा थप जानकारी आउन नसके पनि यहाँको सञ्चारमाध्यमले उनको विषयमा भिडियो रिपोर्ट प्रस्तुत गरेका छन् जहाँ उनले कुनै प्रतिक्रिया दिन अस्वीकार गरेको देख्न सकिन्छ । Watch here >>

नेपाली विद्यार्थी समस्यामा

पछिल्लो समय भारतीय अपराधीहरुले सोझा नेपाली विद्यार्थीलाई तत्कालै फाईदा हुने र ठूलो रकम पाइने आश्वसन दिएर यस्तो काम गराउने गरेको घटना सार्वजनिक हुने क्रम बढेको छ । केही समय अघि दुईजना नेपाली विद्यार्थी पनि यस्तै घटनामा पक्राउ परिसकेका छन् । यो अवस्था निकै चुनौतीपूर्ण रहेको र अष्ट्रेलिया आउने नेपाली विद्यार्थीहरुलाई यस्ता क्रियाकलापमा संलग्न नहुन जानकारीमूलक कार्यक्रम गर्नुपर्ने आवश्यकता देखिएको छ । केही समूदायका सदस्यहरुले भने २० वर्ष उमेरमा अष्ट्रेलियामा आफैं पढ्न आउनसक्ने व्यक्तिले कसैको बहकाउमा मात्रै यस्तो गरेको मान्न नसकिने तर्क गरेका छन् । ईजी मनीका लागि यस्तो कार्य गर्दा पक्राउ परेका छन् । अपराधलाई ढाकछोप होइन कडा कारवाही गरेमा मात्र यो नियन्त्रणमा आउनसक्ने उनीहरुको तर्क छ ।