दक्षिण अफ्रिकामा बिहीबार हात बाँधेर ढुङ्गाले टाउको फोडेर रहस्यमय तथा विभत्स तरिकाले छ व्यक्तिको हत्या भएको फेला परेपछि प्रहरी स्तब्ध भएका छन् । प्रहरी क्याप्टेन फ्रेडरिक भान विकले यस प्रकारको हत्या पहिलोपटक देखिएको बताउँदै हत्यारा पत्ता लगाउन सहयोग गर्न सार्वजनिक रूपमा रेडियोमा आग्रह गरेका छन् । केप टाउनबाट ३० किलोमिटर उत्तरपूर्वमा अवस्थित क्राइफोनटिनका त्रस्त बासिन्दाले पत्रकारहरूलाई आफूलाई प्रहरीले अपराधस्थलमा नजान भनेको र मरेका शव देखे सुत्नै नसक्ने अवस्था आउनसक्ने बताएको जानकारी दिए । फोटो पत्रकार साली लटरिङले साउथ अफ्रिकन टाइम्स समाचारपत्रलाई मृतकको टाउकोमाथि ढुङ्गाको तख्ता रहेको र मस्तिष्क बाहिर आएको देखिएको बताए । उनले मृतकको हात पछाडिपटी बाँधिएको देखिएको बताए । शव वरपर रगत लागेका ढुङ्गाहरू देखिन्थे । प्रहरीले यी छ व्यक्तिको उमेर १८ देखि ३० वर्षको भएको तर उनीहरूको पहिचान हुन नसकेको जानकारी दिए । एक निजी सुरक्षा गार्डले यी व्यक्तिहरूलाई लहरै राखेर मारिएको देखिएको बताए । भान विकले आफूले समुदायलाई यस विषयमा संलग्न भई अपराधीलाई पत्ता लगाउन सहयोग गरिदिन आग्रह गरेको बताए ।