प्रधानमन्त्री सुशील कोइरालासँग नेपाल भ्रमणमा रहनुभएका चाइना इन्स्टिच्यूट अफ कन्टेम्पोररी इन्टरनेसनल रिलेसन्सका उपसभापति याङ मिङजीले प्रधानमन्त्री निवास बालुवाटारमा भेट गर्नुभएको छ । भेट नेपाल चीनबीचको आपसी सम्बन्ध, द्वीपक्षीय सहयोग र नेपालको संविधान निर्माण प्रक्रिया लगायतका विषयमा केन्द्रित भएको थियो । भेटका अवसरमा प्रधानमन्त्री कोइरालाले विपी कोइरालाको पालामा नेपाल¬¬–चीनको सम्बन्ध अत्यन्तै सुमधुर रहेको उल्लेख गर्दै त्यसबेला दुई देशको सीमा निर्धारणका विषय सहमतिमा टुङ्गिएको पनि बताउनुभयो । प्रधानमन्त्री कोइरालाले चीनले नेपालको पूर्वाधार विकास र सामाजिक पूर्वाधार निर्माणमा पनि उत्तिकै सहयोग गर्दै आएकोमा त्यसको सराहना गर्दै चीनकै आर्थिक, प्राविधिक सहयोगमा नेपालका सडकमार्ग, हवाई मैदान, अस्पताल निर्माण भएको पनि उल्लेख गर्नुभयो । सो अवसरमा प्रधानमन्त्री कोइरालाले नेपाल अहिले छ दशकभन्दा लामो ंसङ्घर्षबाट प्राप्त सङ्घीयता, गणतन्त्र र समावेशितासहितको लोकतन्त्रलाई संविधानसभाबाट बन्ने संविधानमा लिपिबद्ध गरी शान्ति र राजनीतिक स्थायित्वको बातावरणमा आर्थिक समृद्धि र विकासको मार्गमा जान तत्पर रहेको बताउनुभयो । भेटमा उपसभापति याङले विकासका लागि शान्ति र स्थायित्व आवश्यक भएको बताउँदै प्रधानमन्त्री कोइरालाको नेतृत्वमा रहेकोे सरकारको सहयोगमा नै नेपालले नयाँ संविधान पाउने विश्वास व्यक्त गर्नुभयो । उहाँले आगामी बर्ष नेपाल–चीन दौत्य सम्बन्ध स्थापनाको ६० औँ वर्ष मनाउने सम्बन्धमा पनि छलफल भएको प्रधानमन्त्रीका प्रेस संयोजक प्रकाश अधिकारीले जानकारी दिनुभयो । भेटमा प्रधानमन्त्री कोइरालाका परराष्ट्र सल्लाहकार डा दिनेश भट्टराई, र नेपाली काँग्रेसकी नेत्री सुजाता कोइरालाको उपस्थिति थियो ।