नेकपा (एमाले)को स्थायी कमिटीको पाँचौँ बैठकले यही माघ ११ गते संविधानसभाबाट विवादित विषयमा प्रश्नावली तयार गर्न ‘प्रस्ताव निर्माण समिति’ गठन हुनाले संविधान निर्माणको कामलाई सुनिश्चित बनाउन योगदान पुगेको ठहर गरेको छ । पार्टी अध्यक्ष केपी शर्मा ओलीको अध्यक्षतामा पार्टी केन्द्रीय कार्यालयमा बसेको सो बैठकमा यही माघ ८ गतेभित्र संविधान जारी गर्ने संविधानसभाको सङ्कल्प र जनताको अपेक्षा विपरीत एनेकपा (माओवादी) नेतृत्वको मोर्चाको ‘अनुत्तरदायी व्यवहार र अवरोध’का कारण पूरा हुन नसकेको पनि जनाएको छ । बैठकपछि महासचिव ईश्वर पोखरेलले जारी गरेको प्रेस विज्ञप्तिमा प्रश्नावली निर्माणको प्रक्रिया प्रारम्भ भए पनि वार्ता र संवादका माध्यमबाट सहमति खोज्ने प्रयास जारी नै रहेको र अहिले पनि एमाले सम्भव भएसम्म सहमतिकै माध्यमबाट अगाडि बढ्न चाहेकामा जोड दिँदै विपक्षी दललाई बहिष्कार, निषेध र सडक आन्दोलनको बाटो छाडेर सहमतिको प्रक्रियामा सामेल हुन पुनःआह्वान गरिएको छ । बैठकले केही दिनयता बजारमा खाना पकाउने ग्यासको हाहाकार सिर्जना भएर सर्वसाधारण जनताको दैनिक जीवन अत्यन्त कष्टकर बन्दै गएको स्थितिप्रति चिन्ता व्यक्त गर्दै कालोबजारियाको नाफाखोर प्रवृत्ति, गैरजिम्मेवार व्यवहार र बदनियतपूर्ण कदमको रोक्न सरकारसँग माग गरेको छ ।