उत्तरी सिरियाबाट आइएस लडाकू समूहले कम्तीमा ९० जना क्रिश्चियन धार्मिक सम्प्रदायका व्यक्तिलाई अपहरण गरेको पुष्टि भएको मानव अधिकारवादी समूहले मङ्गलबार जानकारी दिएको छ । आइएस लडाकू समूहले सोमबार उत्तरी सिरियाको ताल सामिरम र ताल हुर्मोज सहरबाट ती व्यक्तिहरूलाई अपहरण गरेका सिरियन अब्जरभेटरी फर ह्युम्यान राइट्स स्रोतले जानकारी दिएको छ । यद्यपि अब्जरभेटरीका अनुसार दक्षिणी सिरियाको अल कमिसली प्रान्तमा अमेरिकासँग आबद्ध आतङ्कवाद विरुद्धको गठबन्धनले गरेको हवाई आक्रमणमा १४ आइएस लडाकू मारिएका छन् । आइएस लडाकू समूहले सिरियामा बारम्बार आक्रमण गर्दै आएका छन् । हालै आएर यो समूहले लिबियामा आक्रमण सुरु गरेका छन् । केही दिन अघि मात्र आइएस समूहले २० इजिप्टेली क्रिश्चियनको हत्या गरेका थिए ।