सङ्कटग्रस्त रसियाका राष्ट्रपति भ्लादिमिर पुटिनले युक्रेनका विषयमा पश्चिमी मुलुकले मस्कोमाथि लगाएको प्रतिबन्धबीच मुद्रा रुबलको मूल्य बढेको सङ्केत गर्दै बिहीबार अर्थतन्त्रको सबैभन्दा नराम्रो अवस्था अन्त्य भएको दाबी गर्नुभएको छ । वार्षिक ‘‘फोन–इन’’ कार्यक्रममा रसियालाई सम्बोधन गर्दै क्रेमलिनका सबैभन्दा शक्तिशाली व्यक्तिले आर्थिक समस्या अन्त्य भएको दाबी गर्नुभयो र उहाँले युक्रेन सङ्कटका विषयमा पश्चिमी मुलुकले दण्डित गर्न खोजेको पाइला भित्री रूपमा आफ्नो मुलुकका लागि फाइदाजनक भएको बताउनुभयो । उहाँले प्रतिबन्धले सरकार तथा केन्द्रीय बैङ्कलाई सहयोग गरेको दाबी गर्नुभयो । उहाँले प्रतिबन्ध नलगाइएको भए पनि रुबलको सटही दरमा परिवर्तन हुन्थ्यो भन्दै त्यसले रसियाली अर्थतन्त्रलाई पुनः बल दिएको बताउनुभयो । राष्ट्रपति पुटिन रसियाको शासनमा पुगेको मार्च महिनामा १५ वर्ष पुगेको छ र उहाँले रुबल स्थिर र बलियो भएको बताउनुभयो । उहाँले रसिया समस्याको उचाइबाट झर्न थालेको विशेषज्ञहरूले विश्वास गरेको बताउनुभयो । उहाँले आफूहरूले मुलुकको मुद्रालाई सच्याएको र सबै कुराले राम्रोसँग काम गरिरहेको बताउनुभयो । युक्रेनको पूर्वी भागमा युद्ध थामिएको तथा तेलको मूल्य स्थिर हुनथालेपछि रसियाली मुद्राको मूल्य गत वर्ष निकै घटेपछि हाल पाँच महिनामा सबैभन्दा माथिल्लो अवस्थामा पुगेको छ । रुबल अझै पनि मानसिक रूपमा तनावमा पर्ने गरी ५० रुबल प्रति डलरको अवस्थामा बुधबार रहे पनि यो नोभेम्बर महिनापछिको सबैभन्दा राम्रो अवस्था हो । राष्ट्रपति पुटिनले अर्थतन्त्रका विषयमा आफ्नो सरकारको योजनाको प्रशंसा गर्दै यी योजनाले उच्च पेसागत कार्य गरेको दाबी गर्नुभयो । उहाँले अकाशिएको मुद्रास्फीति, बेरोजगारी तथा गत वर्ष १०० अर्ब अमेरिकी डलर बराबर पूँजी पलायनबीच पनि यी समस्या विनाशकारी नभएको बताउनुभयो । गत वर्ष राष्ट्रपति पुटिनले दुई वर्षपछि रसियाली अर्थतन्त्र फेरि माथि आउने बताउनुभएको थियो भने बिहीबार उहाँले अर्थतन्त्रमा सुधार छिटै हुनसक्ने बताउनुभयो । उहाँले पश्चिमी मुलुकले छिटै प्रतिबन्ध हटाउने अपेक्षा रसियाली जनताले गर्न नहुने बताउनुभयो । उहाँले यी कुरालाई रसियाले आफ्नो फाइदाका लगि प्रयोग गर्नुपर्ने बताउनुभयो । गत मार्चमा मस्कोले क्राइमियालाई युक्रेनबाट आफूमा गाभेपछि पश्चिमी मुलुकले रसियामाथि कडा प्रतिबन्ध लगाएका छन् । पश्चिमी मुलुकले मस्कोले युक्रेनको पूर्वी भागमा किभको सरकारसँग युद्ध गरिरहेका लडाकूलाई सहयोग गरिहेको पनि आरोप लगाएका छन् । रसियाली राष्ट्रपति पुटिनलाई मतदाताले उहाँले वर्षौँसम्म आर्थिक स्थायित्व दिएको तुलनात्मक रूपमा समृद्धि देखाएको र तेलको मूल्य उच्च राखेको भनी समर्थन गरेका हुन् । अर्थतन्त्र नराम्रो हुँदा उहाँले गम्भीर चुनौती भोगेको देखिएको थियो । मस्कोमाथि लगाइएको आर्थिक प्रतिबन्धले रसियाली अर्थतन्त्रलाई सङ्कटमा पारे पनि राष्ट्रपति पुटिनप्रतिको उच्च समर्थन घटाउन सकेको छैन । जनताले राष्ट्रपति पुटिनले पश्चिमी मुलुकविरुद्ध आफूलाई उभ्याउनुभएको र त्यसले मुलुकको अन्तर्राष्ट्रिय स्तर बढेको भनी रसियाभर उहाँको प्रशंसा भएको छ । क्रेमलिनका आलोचकहरूले बढ्दो बेरोजगारी, घट्दो तलब तथा निवृत्तिभरणबीच अधिकारी तथा सरकारी टेलिभिजनले समस्याको आकारलाई जानाजान कम आङ्कलन गरेको आरोप लगाएका छन् ।