बुरुन्डीमा सैनिक विद्रोहमा भाग लिने दुई वरिष्ठ सैनिक अधिकारी तथा एक प्रहरी प्रमुखलाई पक्राउ गरिएको राष्ट्रपतिका कार्यालयका प्रवक्ताले शुक्रबार बताएका छन् । यसले राष्ट्रपति पिएरे एनकुरुन्जिजालाई हटाउने सैनिक षडयन्त्र असफल भएको स्पष्ट पारेको छ । प्रवक्ता जरवाइस अबायेहोले सैनिक विद्रोहको प्रयास गर्ने मेजर जनरल गडफ्रायड नियोमबार अझै पनि फरार रहेको र निजको खोजी भइरहेको बताउनुभयो । उहाँले हिरासतमा लिइएका षडयन्त्रकारीको नाम भने बताउनुभएन । अर्का अधिकारीले एनकुरुन्जिजा बुरुन्डीको उत्तरी नगर एनगोजीमा लोकप्रिय हुनुभएको र उहाँबाट एक विज्ञप्ति प्राप्त गर्न सरकारी समाचार समूहलाई त्यहाँ पठाइएको बताए । बिहीबार नियोमबार तथा सरकारप्रति बफादार सेनाबीच बुजुबुरामा सङ्घर्ष भएको थियो । नियोमबारले राष्ट्रपति एनकुरुन्जिजा तान्जानियामा क्षेत्रीय बैठकमा रहेको अवस्थामा उहाँलाई पदमुक्त गरिएको घोषणा गरेका थिए । एनकुरुन्जिजाले राष्ट्रपति पदको तेस्रो कार्यकालका लागि दाबी गरेपछि यस मुलुकमा केही दिन प्रदर्शन भएको थियो । प्रतिपक्षीहरूले यसले संविधान उलङ्घन गरेको र गृहयुद्ध अन्त्य गर्ने शान्ति सम्झौता तोडेको आरोप लगाएका थिए । अप्रिल २६ मा आरम्भ भएको उक्त प्रदर्शनका समयमा १५ व्यक्तिको मृत्यु भएको थियो । बुरुन्डीको राष्ट्रपतिको कार्यालयले बिहीबार प्रदर्शन अन्त्य गर्न प्रयास गरेकोमा प्रहरीलाई धन्यवाद दिएको छ । अमेरिकाले आफ्ना नागरिकलाई बुरुडीबाट बाहिर आउन आग्रह गरेको छ र अन्यलाई बुरुन्डीको भ्रमण नगर्न सल्लाह दिएको छ । बुरुन्डीस्थित अमेरिकी दूतावास शुक्रबार बन्द रहेको छ । बुरुन्डीको संविधानमा राष्ट्रपति दुई कार्यकालका लागि मात्र निर्वाचित हुनसक्ने व्यवस्था गरेको छ । राष्ट्रपति एनकुरुन्जिजाले आफूलाई पहिलो कार्यकालका लागि संसदले निर्वाचित गरेकाले आफू पुनः जनताबाट निर्वाचित हुनपाउने दाबी गर्नुभएको छ । बुरुन्डीमा सन् १९९३ मा गृहयुद्ध भएको थियो र हुटु राष्ट्रपति मेलक्वायर एनदादायको हत्या भएको थियो ।