भारतीय प्रधानमन्त्री नरेन्द्र मोदीले यसअघि उच्चपदस्थ कर्मचारी दिउँसोको खानाका लागि लामो समयसम्म कार्यालयमा अनुपस्थित हुने अवस्था तथा उनीहरूको गल्फ क्लबको सदस्यता हटाइसक्नुभएको छ । योगी भनी ख्याति प्राप्त गर्नुभएको प्रधानमन्त्री मोदीले अब ती कर्मचारीलाई उनीहरूको शरीर तन्दुरुस्त राख्न आफूसँगै बिहान सबेरै शारीरिक अभ्यास गराउन चाहनुभएको छ । प्रधानमन्त्री मोदीले आउँदो महिना भारतीय प्राचीन शारीरिक अभ्यासको अन्तर्राष्ट्रिय दिवस मनाउँदा उहाँको नेतृत्वमा आम योगाभ्यासमा सरिक हुन भनी वरिष्ठ सरकारी कर्मचारीहरूले पत्र प्राप्त गरेका छन् । प्रधानमन्त्री मोदी योगाभ्यासकर्ता हुनुहुन्छ र उहाँले जुन २१ मा नयाँ दिल्लीको केन्द्रमा बिहान ७ः०० बजे खुला रूपमा योगाभ्यास गर्नु हुनेभएको छ भने र ३५ हजार व्यक्तिले उहाँलाई यस अभ्यासमा साथ दिने अनुमान गरिएको छ । एक वरिष्ठ अधिकारीले आफ्नो परिचय नदिने सर्तमा प्रधानमन्त्री मोदीले उक्त दिन ३५ मिनेटसम्म योगाभ्यास प्रदर्शनको नेतृत्व गर्नुहुने बताए । यी अधिकारीले योग हेर्ने मन्त्रालयले सरकारी अधिकारीहरूलाई उक्त दिन गरिने योगासन सही रूपमा गर्न सहयोग गर्न डीभीडी तथा पुस्तिका पठाएको बताए । यी अधिकारीले सरकारी अधिकारीले प्रत्येक दिन १५ देखि २० मिनेटसम्म यस्तो योगाभ्यास गरे उनीहरू उक्त दिनका लागि तयार हुने बताए । उनले यो सरकारी अधिकारी आफैँका लागि फाइदाको कुरा भएको र यो राम्रो अनुभव हुने बताए । संयुक्त राष्ट्र सङ्घले गत वर्ष जुन २१ लाई अन्तर्राष्ट्रिय योग दिवस घोषणा गरेको छ । यससम्बन्धी प्रस्ताव भारतीय प्रधानमन्त्री मोदीले नै राख्नुभएको थियो । शाकाहारी प्रधानमन्त्री मोदी दैनिक रूपमा योगाभ्यास गर्नुहुन्छ र उहाँले संयुक्त राष्ट्र सङ्घको निर्णयबाट गौरवान्वित भएको बताउनुभएको थियो । उहाँ दैनिक रूपमा निकै घण्टा काम गर्नुहुन्छ र निकै कम सुत्नुहुन्छ र यो क्षमता उहाँले योगबाटै प्राप्त गर्नुभएको मानिएको छ । एक वर्ष अगाडि शासनमा आउनुभएका प्रधानमन्त्री मोदीले अप्रभावकारी भनिएको भारतीय कर्मचारीतन्त्रलाई नियन्त्रण गर्न थाल्नुभएको छ । उहाँले दिल्लीको सबैभन्दा पुरानो र सम्मानित गल्फ क्लबले सरकारी कर्मचारीलाई दिएको सदस्यता खारेज गर्नुभएको छ भने उनीहरूलाई समयमै काम गर्न दबाब परेको छ ।