इरानले एक इजरायली चालकविहीन विमान आफ्नो हवाई क्षेत्रबाट खसाएपछि प्यालेस्टाइनीलाई हतियारबद्ध बनाउने कार्यलाई थप गति दिने चेतावनी एक सैनिक कमान्डरले सोमबार दिएका छन् ।

इरानले इजरायली राज्यको अस्तित्वलाई स्वीकार गरेको छैन र उसले गाजाबाट जुलाइ ८ देखि निरन्तर रूपमा रकेट प्रहार गर्न हमास तथा इस्लामिक जिहादका लडाकूहरूलाई प्रविधि उपलब्ध गराएको पुष्टि गरेको छ ।

इरानको क्रान्तिकारी गार्डका वायुसेनाका कमान्डर जनरल अमिर–अली हाजिजादेहले आफ्नो संस्थाको आधिकारिक वेबसाइटमा एक विज्ञप्ति राखी पश्चिमी किनारमा लडाकूलाई हतियारबद्ध बनाउने कार्यलाई गति दिने र कुनै पनि प्रक्रिया दिने इरानको अधिकार भएको उल्लेख गरेका छन् । गत महिना इरानका सर्वोच नेता आयातोल्लाह अली खामेनीले इस्लामी विश्वलाई प्यालेस्टाइनी जनतालाई इजरायलबाट हुने जातिहत्याको प्रतिरोध गर्न सहयोग गर्न हतियारबद्ध बनाउन आग्रह गर्नुभएको थियो । गाजामा सात सातासम्मको हिंसामा मर्ने प्यालेस्टाइनीको सङ्ख्या दुई हजार १२४ पुगेको छ भने इजराली पक्षमा यो सङ्ख्या ६८ रहेको छ । यीमध्ये चार सामान्य नागरिक छन् भने बाँकी सैनिक छन् । अगस्त १९ मा युद्धविरामको व्यवस्था भङ्ग भएपछि गाजाबाट ६५० रकेट इजरायली क्षेत्रमा प्रहार भएको छ भने करिब १०० रकेट इजरायलले नष्ट बनाएको छ । इरानको क्रान्तिकारी गार्डले एक दिनअगाडि इजरायली हर्मेस नाम गरेको स्टिल्थ चालकविहीन विमान मुलुकको मध्यभागमा रहेको नातान्ज युरेनियम प्रशोधन स्थलमाथिबाट खसाएको दाबी गरेको थियो र यसपछि यो चेतावनी आएको हो । नातान्ज इरानको प्रमुख युरेनियम प्रशोधन स्थल हो । यहाँ १६ हजार सेन्ट्रिफ्युज रहेका छन् । तीमध्ये तीन हजारभन्दा बढी फोर्दे संयन्त्रमा रहेको छ र यो संयन्त्र पहाडको भित्रीभागमा रहेकाले नष्ट गर्न कठिन हुने बताइएको छ । इजरायलले प्रायः इरानी पारमाणविक संयन्त्रमा आक्रमण गर्ने चेतावनी दिइरहेको छ । इजरायली चालकविहीन विमान खसाइएको समाचारका विषयमा एएफपीको प्रश्नमा जेरुसेलममा एक इजरायली प्रवक्ताले सेनाले विदेशी आमसञ्चारको समाचारलाई सम्बोधन नगर्ने बताए । जनरल हाजिजादेहले टेलिभिजनमा प्रसारण गरिएको एक पत्रकार सम्मेलनमा इजरायली चालकविहीन विमानलाई राडारले पत्ता लगाउन नसक्ने जानकारी दिए । उनले उक्त विमानका टुक्राहरू फेला पारिएको र त्यसमा विश्लेषण भइरहेको बताए । उक्त विमानले ८०० किलोमिटरको क्षेत्रलाई समेट्नसक्ने बताइएको छ । जनरल हाजिजादेहले उक्त चालकविहीन विमानलाई इरानको गुप्तचर प्रणालीले पत्ता लगाएको र त्यसलाई रिभोलुसनरी गार्डको जमिनबाट आकाशमा प्रहार हुने क्षेप्यास्त्रबाट खसाइएको जानकारी दिए । उक्त विमानमा उच्च गुणस्तरको फोटो खिच्ने दुई क्यामरा रहेको जानकारी दिइएको छ । इरानी टेलिभिजनले उक्त चालकविहीन विमानको टुक्राहरूको तस्वीर सार्वजनिक गरिदिएको छ । हाल इरान तथा पी फाइब प्लस वन अर्थात बेलायत, चीन, फ्रान्स, रसिया, अमेरिका तथा जर्मनीसँग पारमाणविक सम्झौताका लागि वार्तामा रहेको छ । उनीहरूले छ महिने अन्तरिम सम्झौता गरेका छन् जसमा इरानले आफ्ना केही पारमाणविक क्रियाकलाप बन्द गरेको छ भने इरानमाथि लगाइएको अन्तर्राष्ट्रिय प्रतिबन्ध आंशिक रूपमा हटाइएको छ । दुई पक्षलाई इरानको पारमाणविक कार्यक्रमका विषयमा तनाव कम गर्न अन्तिम सम्झौताका लागि वार्ता गर्न समय दिन नोभेम्बर २४ सम्म थप चार महिनाको समय बढाइएको छ ।

इरानलाई कतिसम्म युरेनियम प्रशोधन गर्न दिने भन्ने विषयमा दुबैपक्षबीच मतभेद रहेको छ । वासिङ्टनले तेहरानले आफ्नो कार्यक्रमलाई तीन चौथाइले कम गरोस् भन्ने चाहेको छ भने इरानले सन् २०२१ सम्म बुसेर पारमाणविक ऊर्जा संयन्त्रका लागि इन्धन उपलब्ध गराउन यो क्षमतामा १० गुणा बढाउन चाहेको छ । इजरायलले इरान र छ शक्ति मुलुकबीच तेहरानलाई युरेनियम प्रशोधन कार्यक्रम कायम राख्ने अनुमति दिने कुनै पनि सम्झौता नहोस् भन्ने चाहेको छ । उसले यसबाट तेहरानले पारमाणविक बम बनाउनसक्ने धारणा राखेको छ । तेहरानले भने आफूले पारमाणविक हतियार बनाउन नचाहेको बताएको छ ।