दक्षिण एसियाली क्षेत्रीय सहयोग सङ्गठन (सार्क) को शिखर सम्मेलनका लागि नेपाल आउने सरकार प्रमुख तथा राष्ट्र प्रमुखलाई सरकारले रिट्रिटका लागि धुलिखेल ल्याउने भएपछि यहाँ तयारी सुरु भएको छ । धुलिखेल नगरपालिकाको वडा नं १ स्थित द्वारिकाज हिमालयन साङ्ग्रिला होटल छनोट गरेर त्यहाँको भौगोलिक अवस्था र सुरक्षा संवेदनशीलताका बारेमा जानकारी लिन आज परराष्ट्र मन्त्रालयका निमित्त सचिव शङ्करदास वैरागीको नेतृत्वमा १५ सदस्यीय सरकारी टोली धुलिखेल आएका छन् । सो टोलीमा नेपाली सेना, नेपाल प्रहरी, सशस्त्र प्रहरी र राष्ट्रिय अनुसन्धानका उच्च पदस्थ अधिकारीसमेत सहभागी भएको काभ्रेपलाञ्चोकका सहायक प्रमुख जिल्ला अधिकारी अर्जुनकुमार शर्माले जानकारी दिनुभयो । टोलीसँग स्थानीय प्रशासन र धुलिखेल नगरपालिकाले समेत समन्वय गरेर काम गर्ने छन् । सहायक प्रजिअ शर्माका अनुसार अहिले सरकार प्रमुख तथा राष्ट्रप्रमुखलाई रिट्रिटका लागि धुलिखेल ल्याउन रिर्सोटको छतमा एउटा र धुलिखेल नगरपालिकाको जमिनमा हेलिकोप्टर राख्नका लागि दुई वटा हेलिप्याडसमेत निर्माण गरिने छ । यहाँको बस्ने ठाउँ, कोठा, भौगोलिक जटिलता र सुरक्षा संवेदनशीलताका बारेमा जानकारी लिन उहाँहरू धुलिखेल आउनुभएको हो सहायक प्रजिअ शर्माले भन्नुभयो । शिखर सम्मेलन उद्घाटन पछि राष्ट्र एवम् सरकार प्रमुखलाई रिट्रिटमा लैजाने र सम्भव भएसम्म दुई पक्षीय वार्ताको वातावरण तय गरिदिने प्रचलन छ । सन् २००२ को ११ औँ शिखर सम्मेलनमा नगरकोटमा रिट्रिट दिने भनिए पनि सफल भएको थिएन । सरकारले आगामी मङ्सिरको १० र ११ गते १८ औँ सार्क शिखर सम्मेलन काठमाडौँमा आयोजना गर्न लागेको छ ।