भारतले आफ्नो दुर्गम तथा चीनसँग उत्तरपूर्वी भागमा रहेको विवादास्पद सीमामा राजमार्ग निर्माण गर्ने योजना बनाएको एक अधिकारीले जानकारी दिएका छन् भने यसप्रति बेइजिङले चासो व्यक्त गरेको छ । अरबौँ डलर लागतको उक्त परियोजना अनुसार असम तथा अरुणाचल प्रदेशको पहाडी भाग भएर उक्त सडक अगाडि बढ्ने एक अधिकारीले बताए । गृहमन्त्रालयका अधिकारीले उक्त परियोजनाको विस्तृत विवरण अझै तयार भइरहेको र एक हजार ८०० किलोमिटरको उक्त सडकको निर्माण छिटै आरम्भ हुने जानकारी दिए । प्रधानमन्त्री मोदी मे महिनामा शासनमा आउनुभएपछि उक्त राजमार्गको परियोजना आगाडि आएको हो । यस राजमार्ग परियोजनाका विषयमा चिनियाँ विदेश मन्त्रालयका प्रवक्ता होङ लीले भारतले परिस्थितिलाई थप जटिल नबनाउने अपेक्षा गरिएको बताउनुभयो । उहाँले बेइजिङमा एक दैनिक पत्रकार सम्मेलनमा भारत तथा चीनबीच सीमाविवाद औपनिवेशिक कालदेखि कायम रहेको र यी विषयलाई उचित रूपमा समाधान गर्नुपर्ने बताउनुभयो । उहाँले अन्तिम समाधान नभएसम्म भारतले परिस्थितिलाई थप जटिल बनाउने कुनै कार्य नगर्ने आशा गरिएको बताउनुभयो । सहायक गृहमन्त्री किरेन रिजिजुले यो भारतको इतिहासमा सबैभन्दा ठूलो आधारभूत संरचना परियोजना हुने बताउनुभयो । हाँले यसका लागि ६।५ अर्ब अमेरिकी डलर बराबर खर्च हुने अनुमान गर्नुभयो ।