ग्याँसको सिलिण्डर पड्कियो पर्वतमा, चार जना घाइते
खाना पकाउने क्रममा एलपी ग्यास पड्किएर आगलागी हुँदा पर्वतको बाजुङ गाविसमा एकै परिवारका चारजना घाइते भएका छन् । बाजुङ गाविस वडा नं ६ लाम्पाटाका कृष्णबहादुर केसीको घरमा बुधबार ग्यास पड्किएर आगलागी हुँदा केसीसहित उनकी श्रीमती सङ्गीता केसी, छोरा अविनाश केसी र अमृत केसी घाइते भएका छन् । घाइतेलाई उपचारका लागि मणिपाल शिक्षण अस्पताल पोखरा लगिएको छ । घाइतेमध्ये दुईजनाको अवस्था गम्भीर रहेको स्थानीय उत्तम अधिकारीले जानकारी दिनुभएको छ । साँझ करिब ७ बजेको समयमा खाना पकाउने क्रममा एक्कासि ग्यास पड्किएर आगलागी भएको अधिकारीले जानकारी दिनुभयो ।
