मृत मानिसको मुटु प्रत्यारोपण गर्ने सफलता पाएपछि एकाएक चर्चित बन्नुभएका नेपाली मुटु रोग विशेषज्ञ डा. कुमुद धितालले नेपालमा यस किसिमको अनुसन्धान गर्नका निम्ति आर्थिक अभाव हुने बताउनुभएको छ । एमएनटीभीको कार्यक्रम द भाईवका निम्ति विनोद पौडेल र सुमन सिवाकोटीसँग कुराकानी गर्दै उहाँले आफ्नो सफलता नौलो नभई फरक किसिमको मात्र भएको बताउनुभएको छ । नेपालको गोरखा जिल्लामा पुख्र्यौली घर भएपनि ईटलीमा जन्मनुभएका डा. धिताल ५ वर्षदेखि सिड्नीमा कार्यरत हुनुहुन्छ । यसअघि उहाँ बेलायतमा कार्यरत हुनुहुन्थ्यो । सुरुमा मुसा लगायतका जीवमा परीक्षण गरी सफल भएपछि सुंगुरको मुटु प्रत्यारोपण गरी विश्वस्त भएपछि मात्रै मानिसमा यस किसिमको परीक्षण गरिएको थियो । अहिलेसम्म यस प्रकारको प्रत्यारोपण तीन जनामा गरिसकिएको पनि उहाँले बताउनुभएको छ । विस्तृत अन्तर्वार्ता हेर्न सक्नुहुन्छ एमएनटीभीको युवाकेन्द्रित कार्यक्रम द भाईवमा । – सुमन सिवाकोटी