विभिन्न जनजाति तथा जातीय सङ्घसंस्थाका प्रतिनिधिले निर्धारित समयमा  नागरिकको पहिचान तथा अधिकारसहितको संविधान जारी गर्न माग गरेका छन् । नेपाल आदिवासी जनजाति महासङ्घले आयोजना गरेको कार्यक्रममा  अधिकारकर्मी पद्मरत्न तुलाधरले सबै जाति समुदायका फरक फरक पहिचान तथा संस्कृति रहेकाले तिनलाई सुनिश्चित गर्न माग गर्नुभयो । नेकपा –माओवादीका सचिव देव गुरुडले पहिचानसहितको सङ्घीयताले दलित, उत्पीडितलगायत सबै नागरिकलाई राजनीतिक तथा सामाजिक परिवर्तनको अनुभूति गराउने विचार व्यक्त गर्नुभयो ।  एनेकपा(माओवादी)का नेता हिसिला यमी,  माओवादीका नेता सुरेश आले मगर,  अधिकारकर्मी नरेश ताम्राकार र  राजकुमार लेखी, नेपाल आदिवासी जनजाति महासङ्घका अध्यक्ष नगेन्द्र कुमाललगायतले राज्यले विगतमा गरेका सम्झौतालाई इमान्दारीका साथ लागु गर्नुपर्नेमा जोड दिनुभयो ।