केही महिनायतेखि अस्पतालमै बसेर उपचार गराइरहनुभएका थाई नरेश भूमिबोल अदुल्यादेजले स्वास्थ्यको खराबीका कारण सर्वसाधारण थाई नागरिक एवम् सबैलाई दर्शन भेट नदिने हुनुभएको छ । शुक्रबार थाई राजा भूमिबोलको ८७ औं जन्मदिन हो । उहाँ बिरामी भई केही महिनायतादेखि अस्पतालको शय्यामा हुनुहुन्छ । त्यसैले यस पटकको जन्मदिनको अवसरमा यसअघिजस्तो उहाँले दिने गर्नुभएको दर्शन भेट नदिने हुनुभएको हो । थाई नरेश त्यहाँका नागरिकबीच लोकप्रिय हुनुहुन्छ । उहाँको जन्मदिनको अवसरमा हजारौं नागरिकले अस्पताल बाहिरै पुगेर शुभकामना दिएका छन् । उहाँ गत वर्षपनि बिरामी नै रहेको समयमा सो अस्पतालमा उपचार गराइरहनुभएको थियो र त्यसै अस्पतालको बरण्डामा उभिएर सबै नागरिकलाई सामुहिक दर्शनभेट दिनुभएको थियो । र यस पटक भने स्वास्थ्य अवस्था नाजुक भएकोले चिकित्सकले बाहिर नकिस्कन भनेका बताइएको छ । शाही चिकित्सकहरूको एक टोलीले राजा सामुहिक दर्शन भेटका लागि पनि बाहिर निस्कन नहुने सुझाव दिएका थिए । उहाँलाई शुभकामना दिन जाने नागरिकका लागि अस्पतालको बरण्डाबाट उहाँले दर्शन भेट दिने र त्यही दृश्य टेलिभिजनले पनि प्रत्यक्ष प्रशारण गर्नेगरी कार्यक्रम मिलाइएकोमा चिकित्सकले सोका लागि अनुमति नदिएपछि स्थगित गरिएको समाचारमा जनाइएको छ । थाई राजाको जन्मदिनलाई थाइल्यान्डमा फादर्श डे का रुपमा पनि मनाउने चलन छ । सो दिन त्यहाँ सार्वजनिक बिदा दिने गरिएको छ । राजा भूमिबोल थाइल्याण्डको राज्य प्रमुख तथा अभिभावकका रुपमा पनि मानिनुहुन्छ । उहाँ विश्वकै सबैभन्दा लामो समयसम्म राजगद्दीमा रहने राजा पनि हुनुहुन्छ । औपचारिक राजा (सेरेमोनियल किङ्) का रुपमा रहनुभएका राजा भूमिबोलको शासन सत्ता सञ्चालनका क्षेत्रमा भने कुनै अधिकार छैन । उहाँ राज्य प्रमुखका रुपमा रही आउनुभएको छ ।