पाकिस्तानमा सन् २००७ मा पूर्व प्रधानमन्त्री बेनजिर भुट्टोको हत्या गर्ने प्रयासमा १३९ व्यक्तिको हत्या भएको बमआक्रमणका लागि जिम्मेवार तालिवान कमान्डरलाई मारिएको जानकारी पाकिस्तानी प्रहरीले मङ्गलबार दिएको छ । पाकिस्तानको सबैभन्दा ठूलो नगर कराचीनजिकै रहेको माङ्गोपिरमा प्रहरी तथा लडाकूबीच करिब एक घण्टा लामो गोली प्रहारमा फिर्दौस खान मारिएको जानकारी अपराध अनुसन्धान विभागका वरिष्ठ अधिकारी उस्मान बाज्वाले दिए । सन् २००७ को अक्टोबरमा पाकिस्तानमा एक राजनीतिक ¥यालीमा भुट्टोको ट्रक नजिकै भएको व्यापक क्षतिकारक बम आक्रमणको योजना खानले तयार गरेको जानकारी बाज्वाले दिए । भुट्टो उक्त आक्रमणमा जोगिनुभए पनि त्यसको दुई महिनापछि रावलपिन्डीमा एक ¥यालीमा एक आत्मघाती बम आक्रमणमा उहाँको हत्याभएको थियो । फिर्दौस खान तालिवान कमान्डर भएको र निजले आत्मघाती बम आक्रमणकारीलाई सहयोग तथा तालिम दिएको र लक्ष्यमा पु¥याएको बाज्वाले बताए । तत्कालिन सैनिक शासक पर्वेज मुसर्रफको प्रशासनले उक्त आक्रमणको जिम्मेवारी पाकिस्तानी तालिवान प्रमुख वैतुल्लाह मेहसुदमाथि लगाएको थियो । मेहसुदले उक्त आक्रमणमा आफ्नो संलग्नता नभएको बताएका थिए भने सन् २००९ को अगस्तमा अमेरिकी चालकविहीन विमान आक्रमणमा उनको मृत्यु भएको थियो । बाज्वाले सोमबार राती तथा मङ्गलबार बिहान उक्त भिडन्त भएको जानकारी दिए । अध्यारोको फाइदा उठाइ अन्य लडाकू भने उक्त भिडन्तका समयमा भाग्न सफल भएको उनले बताए । तेहरिक–ए–तालिवानले सन् २००७ मा पाकिस्तानमा विद्रोह आरम्भ गरेपछि हालसम्म सात हजारभन्दा बढी व्यक्तिको मृत्यु भइसकेको छ ।