बयर खान भनेर शुक्लाफाँटा वन्यजन्तु आरक्षभित्र छिरेका भीमदत्त नगरपालिका–१९ बागफाँटाका आठ बालिकालाई आरक्ष सुरक्षार्थ खटिएको सेनाको एक टोलीले सकुशल उद्धार गरेको छ । आरक्ष सुरक्षार्थ खटिएको गरुडदल गणअन्तर्गतको पिपरीया पोस्टबाट खटिएको टोलीले बालिकाको सकुशल उद्धार गरेको हो । सोमबार बेलुका विद्यालयबाट घर फर्केका बालिका बयर खोज्ने भन्दै शुक्लाफाँटा वन्यजन्तु आरक्षभित्र छिरेका थिए । यसपछि उनीहरु जंगलमै हराए र बाटो भुलेपछि फर्किन सकेनन । परिवारजनले खोजी गर्न आग्रह गरेपछि सेनाको टोलीले सबै बालिकाको उद्धार गरी आरक्ष कार्यालयलाई बुझाएको गरुडदल गण मझगाउँ ब्यारेकले जनाएको छ । उनीहरुलाई पिपरिया पोस्टको झन्डै तीन किलोमिटरभित्र जङ्गलमा फेला पारेको थियो । आरक्ष कार्यालयले पनि उद्धार गरिएका बालिकालाई अभिभावकको जिम्मा लगाइसकेको छ । बालिकाको खोजीका लागि आरक्ष सुरक्षार्थ खटिएको सेनाका सबै पोस्ट तथा आरक्ष प्रशासन मध्यरातसम्म खटिएका थिए । खोजीका क्रममा उनीहरु भोलिपल्ट भेटिएका हुन् । एक रात आरक्षमा अलपत्र परेका बालिकाहरु सातदेखि ११ वर्षसम्मका रहेका छन् ।