एकीकृत नेकपा (माओवादी)ले सबै नियमावलीलाई खारेज गरी संविधानको मस्यौदा आफैं ल्याउँछु भन्ने सभामुख सुवास नेम्वाङको भनाइ आपत्तिजनक भएको टिप्पणी गरेको छ । प्रवक्ता दीनानाथ शर्माले सभामुख नेम्वाङको प्रस्ताव र अभिव्यक्ति पूर्णत गलत भएको बताउनुभयो । उहाँले सभामुख नेम्वाङको भूमिका सबै राजनीतिक दलहरुको बीचमा समन्वय गर्ने र सहमतिको अन्तिमसम्म प्रयास गराउने रहेको बताउँदै संविधानसभा व्यवस्थापिका–संसद् कार्यसञ्चालन नियमावलीका धाराहरुलाई खारेज गरेर आफ्नो हातमा अधिकार लिएर संविधान बनाउँछु भन्नु लोकतन्त्रको खिल्ली उडाउनु मात्रै भएको बताउनुभयो । लोकतान्त्रिक विधि र मान्यता विपरीत तथा योजनाबध्द रुपमा आएको अभिव्यक्तिलाई स्वीकार गर्न सकिँदैन, संविधानसभाको अध्यक्षको पद मर्यादित पद भएकाले यसको गरिमा कायम राख्न प्रवक्ता शर्माले सभामुखलाई आग्रह गर्नुभयो । प्रवक्ता शर्माले एक थान संविधानले नेपाली जनताको हित नगर्ने भएकाले त्यसमा सबै वर्ग, क्षेत्रको अधिकार समेटिन्छ कि समेटिँदैन भन्ने प्रश्न नै अहम् रहेको उल्लेख गर्नुभयो । आफ्नो पार्टीले राजनीतिक सहमतिको आधारमा संविधान निर्माण गर्न चाहेको स्पष्ट पार्दै उहाँले सबै जातजाति, क्षेत्र, लिङ्गका जनताको अधिकार सुनिश्चित हुने र दीर्घकालसम्मका लागि अपनत्व हुने मूल कानुनको जरुरी रहेको तर्क गर्नुभयो । प्रवक्ता शर्माले माओवादीलाई दोष लगाएर माघ ८ गते टार्ने सत्तारुढ दलको प्रयत्न सतहमा देखिएकोले आफूहरु आन्दोलनमा जानु परेको धारणा पनि व्यक्त गर्नुभयो ।