फ्रान्सको व्यङ्ग्यात्मक साप्ताहिक पत्रिका चार्ली हेब्दोको कार्यालयमा बन्दुकधारीहरूले कालास्निकोभ्स बन्दुक तथा क्षेप्यास्त्र प्रहार गर्दा कम्तीमा १२ व्यक्तिको मृत्यृ भएको छ । यस लगत्तै सुरक्षा व्यवस्था कडा बनाइएको छ भने विभिन्न ठाउँमा छापा मारेर सम्भावित अपराधीहरुको खोजी भइरहेको छ । यसैबीच, राष्ट्रपति फ्राँस्वा अलोँ तत्कालै पेरिसको उक्त घटनास्थलतर्फ लाग्नुभएको छ । उहाँले यसलाई आतङ्कवादी आक्रमणको रूपमा लिनुभएको छ । राष्ट्रपति अलोँले यसलाई अति बर्बरताको कार्य भएको बताउनुभयो ।  बन्दुकधारीले १२ व्यक्तिको हत्या गरेको र अल्लाहु अकबर भन्ने नारा लगाएको बताइएको छ । हाल सरकारले पेरिस बृहतर क्षेत्रमा उच्च सतर्कता अपनाएको छ भने राष्ट्रपति अलोँले राष्ट्रिय एकताका लागि आग्रह गर्नुभएको छ । उहाँले हालका सातामा अनेकौँ आतङ्कवादी आक्रमणका प्रयास असफल पारिएको बताउनुभयो । बुधबारको आक्रमण पेरिसमा गत केही दसकमा सबैभन्दा नराम्रो आक्रमण भएको ठानिएको छ । अनुसन्धानसँग नजिकका एक स्रोतले दुई पुरुषले कालास्निकोभ तथा रकेट प्रक्षेपकका साथ पेरिसको मध्य भागमा रहेको उक्त कार्यालयको भवनमा प्रवेश गरेको र सुरक्षाकर्मीसँग उनीहरूको गोली प्रहार भएको बताए । उक्त स्रोतल बन्दुकधारीले एक कार अपहरण गरी भाग्नखोज्दा गरी बटुवालाई ठक्कर दिएको बताए । उनले यस आक्रमणमा दुई प्रहरी अधिकारीको मृत्यु भएको जानकारी दिए । टेलिभिजनमा घटनास्थलमा निकै प्रहरीलाई देखाइएको छ । यसका साथमा गोली लागेका झ्याल तथा मानिसलाई अस्पतालतर्फ लैजाँदै गरिएको पनि देखाइएको छ । प्रहरी स्रोतले ती बन्दुकधारीले आफूले धर्मगुरुको बदला लिएको भनी चिच्याएको प्रहरी स्रोतले बताए । आक्रमणकारीलाई के भयो भन्ने सम्बन्धमा तत्कालै थाहा हुनसकेको छैन । बेलायती प्रधानमन्त्री डेविड क्यामरुनले ट्विटरमार्फत उक्त कार्यको भत्र्सना गर्नुभएको छ । यस पत्रिकाले सन् २००६ मा धर्मगुरु मोहम्मदको व्यङ्ग्यचित्र पुनः छापेपछि त्यसको आलोचना भएको थियो । उक्त व्यङ्ग्यचित्र डेनमार्कका दैनिक पत्रिका जिलान्डस–पोस्टेनमा पहिलोपटक प्रकाशन भएको थियो । त्यसको मुसलमान विश्वबाट कडा आलोचना भएको थियो । सन् २०११ को नोभेम्बरमा चार्ली हेब्दोको नामबाट धर्मगुरु मोहम्मदको व्यङग्यचित्र प्रकाशन गरेपछि यस संस्थाका कार्यालयहरूमा अग्निबम प्रहार भएको थियो । जातीय विभेदविरुद्ध यस पत्रिकाका विषयमा अदालतमा मुद्दा दायर भए पनि यस साप्ताहिकले निरन्तर रूपमा धर्मगुरु मोहम्मदको व्यङ्ग्यचित्र प्रकाशन गरेको थियो । सन् २०१२ को सेप्टेम्बरमा यस पत्रकाले धर्मगुरु मोहम्मदको नाङ्गो व्यङ्ग्यचित्र प्रकाशन गरेको थियो । अमेरिकामा धर्मगुरु मोहम्मदको आलोचना गर्दै कम बजेटको ‘‘इन्नोसेन्स अफ मुस्लिम्स’’ नामक चलचित्र बनेपछि विभिन्न मुलुकमा हिंसात्मक प्रदर्र्शन भएका थिए । यसपछि विश्वका २० मुसलमान मुलुकमा फ्रान्सको राजदूतावासमा आक्रमण हुनसक्ने आशङ्कमा यस्ता कार्यलय बन्द गरिएका थिए । यस पत्रिकाका सम्पादक हाल प्रहरीको सुरक्षा रहेका छन् र उनीमाथि ज्यानको धम्की दिइएको छ । अमेरिकाले उक्त कार्यको सम्भवत सबै शब्दले भत्र्सना गरेको छ । ह्वाइट हाउसका प्रवक्ता जोस अर्नेस्टले ह्वाइट हाउसका रहेका सबै उक्त घटनामा मारिएका तथा घाइते भएका व्यक्तिको पक्षमा रहेको बताउनुभयो ।