नेकपा ९एमाले० का अध्यक्ष केपी शर्मा ओलीले पुस २९ गतेसम्म पनि दलहरुबीच सहमति हुन नसके प्रक्रियामै गएर संविधान जारी गर्नुपर्ने बताउनुभएको छ । उहाँले सहमतिका लागि संवैधानिक राजनीतिक संवाद तथा सहमति समितिमा पुनः छलफल लागि लगिएको र आलटाल नगरी सहमति नभए प्रक्रियामै गएर भए पनि माघ ८ मै संविधान जारी गर्ने बताउनुभयो । अध्यक्ष ओलीले भन्नुभयो, “मुलुकलाई असफलताको बिन्दुमा लैजानु हुँदैन, सहमति नभए प्रक्रियामै गएर संविधान जारी गर्नुपर्छ, त्यसका लागि संविधान, नियम, नियमावली र कानुनअनुसार चल्नुपर्छ ।” सहमतिका लागि पार्टी हदैसम्म लचिलो छ, सहमतिका निम्ति कुरा गर्दागर्दै बालुवाटार बैठकमा मधेसी मोर्चाका साथीहरु विरोध गर्दै बिनाकारण बैठकबाट बाहिरिएको भन्दै सहमतिमा आउन उहाँले आग्रह गर्नुभयो । सत्ता मोहमा भन्दा पनि आफ्नो पूरै ध्यान निर्धारित मितिमै संविधान जारी गर्ने भएको भन्दै उहाँले भन्नुभयो, “जेल पर्दा त बाहिर निस्कन मलाई हतार भएन, अहिले पनि सत्ता मोहको मलाई हतार छैन ।” पार्टीका नेता माधवकुमार नेपालले सहमति भए वा नभए पनि माघ ८ मै संविधान जारी गर्न अझै समय पुग्ने भन्दै सहमतिमा आउन सबैलाई आग्रह गर्नुभयो । एमालले संविधान लेखनको विकासक्रम सम्बन्धमा पार्टीको दृष्टिकोण स्पष्ट गर्न र पार्टीका अडान सार्वजनिक गर्न जारी गरिएको विज्ञप्ति पार्टीका सचिव प्रदीपकुमार ज्ञवालीले वाचन गर्दै एमालले माघ ८ को ‘आतङ्क’ सिर्जना गरेको, निर्धारित मितिमा संविधान नआए ‘आकाश खस्दैन’, एमालेलाई सरकार परिवर्तनको हतारजस्तो कुराहरु जनमतको अबमूल्यन र आफ्नो प्रतिबद्धताको उपहास गरेको बताउनुभयो । विज्ञप्तिमा समयमै संविधान जारी गर्नका लागि अन्तिम विकल्पको रुपमा अघि सारिएको प्रक्रिया र दुई तिहाइ बहुमतको विषयलाई लिएर सदनभित्रै ‘रगतको खोलो बगाउने’, अर्को युद्धका लागि तयार हुन’ जस्ता धम्की दिने कार्य आपत्तिजनक नभएर अस्वीकार्य भएको उल्लेख गरिएको छ । सङ्घीयताले राज्यलाई अझ सबल र सुदृढ गरी बहुभाषिक, बहुसांस्कृतिक, बहुजातीय, बहुधार्मिक र भौगोलिक विविधतायुक्त समाजमा सामाजिक सद्भाव, सहअस्तित्व र राष्ट्रियतालाई बलियो बनाउने हुनुपर्ने विज्ञप्तिमा उल्लेख छ ।
एकीकृत नेकपा ९माओवादी०ले प्रमुख राजनीतिक दलबीच संविधानका विवादित विषयमा छलफल चलिरहेको बेला नेकपा९एमाले०का अध्यक्षका कारण वातावरण भाँडिएको आरोप लगाएको छ । ‘‘संविधान निर्माण नहोस् भन्ने ध्येयका साथ एमालेका अध्यक्ष ओली वातावरण भाड्दै हिँड्नुभएको छ । यसले दलहरुबीच समेत अविश्वासको वातावरण बनाएको छ’’ एमाओवादी प्रवक्ता दीनानाथ शर्माले भन्नुभयो । आफ्नो पार्टीको नेतृत्वमा रहेको ३० दलीय मोर्चा असाध्यै लचिलो भएर संविधानको अन्तरवस्तुमा सहमति जुटाउन लागेको तर्क गर्दै उहाँले शासकीय स्वरुप र सङ्घीयताका विभिन्न विकल्पका बारेमा छलफल गर्न तयार रहेको जानकारी गराउनुभयो । उहाँले माघ ८ गतेभित्र पूर्णरुपमा संविधान नबने पनि सहमतिको वातावरण बने त्यो महत्वपूर्ण विषय भएको बताउनुभयो । संविधान घोषणा गर्नेभन्दा पनि अन्तरवस्तुमा सहमति गर्ने कुरा ठूलो भएको उहाँको धारणा थियो । उहाँले संविधानसभाबाट संविधान नबनाइ बल र बहुमतको आधारमा बनाउने कुरा आएकाले त्यसका विरुद्ध आन्दोलन गर्नुपरेको तर्क गर्नुभयो ।