नववर्ष २०१५ को शुभकामना आदानप्रदान गर्नका निम्ति आयोजना गरिएको शुभकामना साँझ सम्पन्न भएको छ । सिड्नीको हर्षभिलस्थित मराना अडिटोरियममा नेपाली युथ फोरम अष्ट्रेलियाको आयोजना गरिएको साँझको शुभारम्भ पानसमा बत्ति बालेर एनआरएन संरक्षक ईन्द्रा वन र एनआरएन अष्ट्रेलियाका अध्यक्ष महेन्द्र ओलीले संयुक्त रुपमा गर्नुभएको थियो । कार्यक्रममा सिड्नीका स्थानीय कलाकारहरुले आकर्षक नृत्य, गीत, प्रहसन प्रस्तुत गरेका थिए । साँझ ७ बजेबाट सुरु भएको कार्यक्रममा बोल्दै फोरमका अध्यक्ष भरत देवकोटाले सिड्नीका युवालाई समेट्दै स्थानीय तहमा क्रियाशील कलाकारको सम्मानका निम्ति आयोजना गरिएको कार्यक्रमलाई निरन्तरता दिने बताउनुभयो । नेपाली र अष्ट्रेलियाको राष्ट्रिय गानबाट सुरु भएको कार्यक्रममा शब्दमालाका साना बालबालिकाले नृत्य गरेका थिए भने नेपिन्डो समूहले पनि आफ्नो प्रस्तुति दिएको थियो । यस्तै अन्य स्थापित सिड्नी स्टारहरुको आकर्षक प्रस्तुति देख्न सकिन्थ्यो । तस्वीरका लागि एमएनटीभीको फेसबुक पेजमा जानुहोला।