अफगानिस्तानको अघोषित भ्रमण पुग्नु भएका नवनियुक्त अमेरिकी प्रतिरक्षा मन्त्री आस्टन कार्टरले अफगानिस्तानबाट अमेरिकी सैनिक फर्काउने योजनाको समय तालिका पुनः विचार गरिने बताउनु भएको छ । राष्ट्रपति भवन अर्गमा अफगानिस्तानका राष्ट्रपति मोहमद असरफ घानीसँग कार्टरले गर्र्नु भएको वार्ता पछि प्रकाशित संयुक्त प्रेसविज्ञप्तिमा उक्त कुरा उल्लेख भएको छ । अफगान राष्ट्रपति घानीको आगामी महिना हुनगइरहेको वासिङ्गटन भ्रमणका बखत राष्ट्रपति ओबामासँग अमेरिकी सैनिक फर्काउने समय तालिकाका सम्बन्धमा विस्तृत पुनः विचार हुने र यसै छलफलले समय तालिकाको टुङ्गो लगाउने समेत गत मङ्गलबार मात्र नियुक्त हुनु भएका अमेरिकी पेन्टागन प्रमुख कार्टरले बताउनुभयो । गत वर्षको अन्त्यदेखि अमेरिकी तथा नेटो सैनिकले युद्धमा प्रत्यक्ष भाग नलिए पछि अफगानिस्तानमा रहेका १२,००० बहुर्राष्ट्रिय सेनामध्ये अमेरिकी सेनाको सङ्ख्या १०,८०० जति छ । यी सैनिकहरुले अफगान राष्ट्रिय सेनालाई तालिम दिने, युद्धकला सिकाउने जस्ता कार्य गर्दै आइरहेका छन् । अफगानिस्तानमा हाल बाँकिरहेका सैनिकहरुमध्ये सन् २०१५ को अन्त्यसम्म करिब पाँच हजार अमेरिकी सैनिकलाई फर्काइने र बाँकी रहेका अरु सबै अमेरिकी सैनिकलाई पनि आफ्नु राष्ट्रपतिकालको अन्त्यसम्ममा फर्काइने अमेरिकी राष्ट्रपति बाराक ओबामाको योजना रहेको छ ।