उत्तरी सिरियाबाट आइएस लडाकू समूहले कम्तिमा ९० जना क्रिश्चियन धार्मिक सम्प्रदायका व्यक्तिलाई अपहरण गरेको घटनालाई लिएर संयुक्त राष्ट्रसङ्घको सुरक्षा परिषद्ले बुधबार कडा शब्दमा निन्दा गरेको छ । सो परिषद्ले अपहरणमा परेका ती व्यक्तिलाई बिनासर्त तुरुन्तै मुक्त गर्न आइएसलगायत अन्य आतङ्ककारी समूहसँग मागसमेत गरेको छ । आइएस लडाकू समूहले गत सोमबार उत्तरी सिरियाको ताल सामिरम र ताल हुर्मोज सहरबाट ती व्यक्तिलाई अपहरण गरेका सिरियन अब्जरभेटरी फर ह्युमन राइट्स स्रोतले जानकारी दिएको थियो । आइएस लडाकू समूहले सिरियामा बारम्बार आक्रमण गर्दै आएका छन् । हालै आएर यो समूहले लिबियामा आक्रमण सुरु गरेका छन् । केही दिनअघिमात्र आइएस समूहले २० इजिप्टेली क्रिश्चियनको हत्या गरेका थिए ।