यू–१९ साफ च्याम्पियनसीप फुटबलको समूह ’ए’ अन्तर्गत भएको खेलमा बङ्गलादेशले भुटानलाई २–० ले हराएको छ । हारसँगै भूटान प्रतियोगिताको समूहचरणबाटै बाहिरिएको छ । सातदोबाटोस्थित एन्फा कम्प्लेक्स मैदानमा भएको खेलमा बङ्गलादेशका लागि रोहित सरकारले ४१ औँ मिनेटमा पहिलो गोल गरे । दोस्रो गोल मनाफ रब्बीले ४३ औँ मिनेटमा गरे । पहिलो हाफमा २–० ले अग्रता लिएको बङ्गलादेशले दोस्रो हाफमा गोल गर्न सकेन । समूहको दोस्रो खेल खेलेको भूटानको यो लगातार दोस्रो हार हो । यसअघि उद्घाटन खेलमा भूटान नेपालसँग ३–० ले पराजित भएको थियो । समूहको विजेताका लागि आगामी सोमबार नेपाल र बङ्गलादेशबीचको खेलले निर्धारण गर्छ । अहिले नेपाल र बङ्गलादेश समान तीन÷तीन अंकमा छन् र दुवैको गोल अन्तर पनि समान रहेको छ । आजको खेलपछि समूह ‘ए’बाट नेपाल र बङ्ंगलादेशले सेमिफाइलनको यात्रा तय गरेका छन् । आइतबार भारत र अफगानिस्तानबीच प्रतिस्पर्धा हुनेछ । अफगानिस्तानले यसअघि शुक्रबार भएको खेलमा माल्दिभ्सलाई ३–१ ले पराजित गरेको छ भने भारतको यो पहिलो खेल हुनेछ ।