नेकपा (एमाले)भित्र उपाध्यक्ष विद्यादेवी भण्डारीबाहेक अन्य नेता पनि राष्ट्रपतिको उम्मेदवार बन्ने चर्चा चले पनि उहाँको नाममा सर्वसम्मत निर्णयपछि पार्टीभित्रको आन्तरिक एकता थप सृदृढ भएको देखिएको छ । एमालेको आजकोे स्थायी कमिटीको बैठकमा प्रधानमन्त्री एवम् पार्टी अध्यक्ष केपी शर्मा ओलीको प्रस्ताव तथा वरिष्ठ नेता झलनाथ खनाल र नेता माधवकुमार नेपालको समर्थनमा स्थायी कमिटीले एक मतका साथ भण्डारीलाई उम्मेदवार बनाएकाले यो निर्णयले पार्टीलाई थप उचाइमा लैजाने एमालेका सचिव प्रदीपकुमार ज्ञवालीले बताउनुभयो । एमालेभित्र वरिष्ठ नेता खनाल र पूर्वसभामुख सुवास नेम्वाङको चर्चा चलेको थियो । संयोगवश उपाध्यक्षका हैसियतमा भण्डारी पनि बैठकमा सामेल हुनुहुन्थ्यो । एमालेका उम्मेदवारलाई सत्तारुढ गठबन्धनबाट मत प्राप्त हुने देखिएकाले पूर्व जनसङ्ख्या तथा वातावरण र रक्षामन्त्री तथा अखिल नेपाल महिला सङ्घको अध्यक्षसमेत रहनुभएका भण्डारीको विजय निश्चित भएको पनि एमालेका नेताहरूको बुझाइ छ । प्रमुख प्रतिपक्षी नेपाली काँग्रेसले पनि सो पदमा उम्मेदवारी दिने निर्णय गरे पनि उम्मेदवारको नाम तय गरिसकेको छैन । उपराष्ट्रपतिमा हालसम्म एमाओवादीका नन्दबहादुर पुन मात्र उम्मेदवारमा चयन हुनुभएको छ ।