३४औं अन्तर्राष्ट्रिय हात्ती पोलो प्रतियोगिता नवलपरासीको अमलटारीमा सुरु भएको छ । चितवन राष्ट्रिय निकुञ्जको पश्चिम सेक्टर अमलटारीस्थित गुन्द्रही ढकाहा मध्यवर्ती सामुदायिक वनको चौरमा खेल सुरु भएको हो । आइतबार हात्तीसहित खेलाडी मैदानमा उत्रिएर खेलको शुभारम्भ गरेका हुन् । सन् १९८२ देखि चितवनको मेघौलीमा सुरु भएको सो खेल पहिलोपटक नवलपरासीको पर्यटकीय गाउँ थारू होमस्टे नजिकै भएको छ । गत वर्ष बर्दिया राष्ट्रिय निकुञ्जमा भएको सो खेल यस वर्ष यहाँ आयोजना भएको हो । टाइगर टप्स होटलको आयोजनामा बर्सेनी यो खेल हुने गरेको छ । चितवन राष्ट्रिय निकुञ्जबाट होटलबाहिर राख्ने सरकारी निर्णयसँगै २०६६ सालमा बर्दियामा सो खेल पुगेको थियो । विसं ०६७÷६८ मा मेघौलीमा पुनः खेल सुरु भए पनि ०६९ देखि ०७१ सालसम्म बर्दिया भएको थियो । हात्तीमा माहुतेसहित पछाडि खेलाडी रहन्छन् । बललाई हात्तीको सहयोगमा खेलाडीले पोस्टमा लगेर गोल गर्दछन् । सो खेलका लागि स्विजरल्यान्ड, इङल्यान्ड, श्रीलङ्का, अस्ट्रेलिया, अरविया, युएसए र नेपालका गरी आठवटा समूह रहेको छ । घरेलु समूहमा टाइगर टप्स टियुस्केयर नेपाल र थारू टाइगर्स रहेको टाइगर टप्स होटलका व्यवस्थापक डिबी चौधरीले जानकारी दिनुभयो । पाँच दिनसम्म चल्ने खेल हेर्नका लागि विदेशी तथा स्वदेशी पाहुना अमटारी थारू होमस्टेमा आएका छन् । थारू गाउँमा अन्तर्राष्ट्रिय स्तरको हात्ती पोल खेल भएकामा स्थानीयवासी खुसी भएका छन् । सो खेल नेपालमा मात्र हुने अन्तर्राष्ट्रिय खेल हो । अमलटारी मध्यवर्ती उपभोक्ता समिति, अमलटारी थारू होमस्टे लगाएकाले स्थानीय रुपमा सहयोग पु¥याइरहेको थारू होमस्टेका अध्यक्ष प्रेम शङ्करमर्दनियाले बताउनुभयो । सोमबारदेखि मङ्सिर ११ गतेसम्म भने प्रतियोगितात्मक खेल हुने व्यवस्थापक चौधरीले जानकारी दिनुभयो ।