उत्तरी अर्जेन्टिनाको साल्टा नजिकै भएको एक बस दुर्घभटनामा परी सोमबार ४१ जना प्रहरी अधिकारीको मृत्यु भएको छ । अर्जेन्टिनाको राजधानी बुइनोस एैरिसबाट एक हजार ५०० किलोमिटर उत्तरमा भएको उक्त दुर्घटनाका कारण भने थाहा भइनसकेको बताइएको छ । सडकबाट पुलमा चढ्ने क्रममा बस चिप्लिएको र पुलबाट २० मिटर तल खसेको यहाँको विशेष प्रहरी फोर्स नेसनल जेन्डरमेरीले जारी गरेको एक वक्तव्यमा जनाइए पनि यसबारे अनुसन्धान भैरहेको बताइएको छ । घटनामा घाइते भएका करिब २० प्रहरीलाई स्थानीय अस्पतालमा उपचारर्थ भर्ना गरिएको अर्जेन्टिनाको स्टेट एजेन्सी तेलामले जनाएको छ । तीनवटा बस गएका प्रहरी साल्टा क्षेत्रको गस्तीमा गएको बेला उक्त दुर्घटना भएको थियो । अर्जेन्टिनामा कमसल ग्रामिण सडक संरचनाका कारण बर्षेनी ठूलो संख्यामा दुर्घटनाका कारण नागरिकको मृत्यु हुने गरेको पाइन्छ ।