अझै पनि नेपालीहरु हस्तलिखित पासपोर्ट बोकेर नै विमानस्थल पुग्ने गरेको घटना अष्ट्रेलियामा सार्वजनिक भएको छ । अष्ट्रेलियामा बसोबास गर्ने केही नेपालीहरुले जानकारीको अभावमा हस्तलिखित राहदानी नै प्रयोग गरिरहेको पाइएको हो । क्यानबेरास्थित नेपाली दूतावासका डेप्युटी चिफ अफ दि मिशन राजेन्द्र पाण्डेका अनुसार यस्ता घटनामा दूतावासले चिठ्ठी लेखिदिएर र अध्यागमन अधिकारीहरुलाई अनुरोध गरेर उनीहरुलाई नेपाल पठाउने व्यवस्था गरेको उहाँको भनाई छ । पाण्डेले भन्नुभयो सबैले मेशिन रिडेबल पासपोर्ट बनाइसक्नुभयो । तर, अझै पनि कतिपय भने विमानस्थलमा पुगेर अलपत्र परेको अवस्थामा उद्धार गर्नुपरेका घटना पनि छन् ।”
नोभेम्बर २० पछि कम्तिमा पनि ८ जनालाई यसरी विमानस्थलबाट नै उद्धार गर्नुपरेको उहाँले बताउनुभयो । “अन्तर्राष्ट्रिय नियम अनुसार पासपोर्ट जारी गर्ने देश नै जान लागेको अवस्थामा हस्तलिखित राहदानी भएकाहरुलाई पनि त्यहाँ जान दिन सकिन्छ । अन्य देशमा जान भने यो पासपोर्टले काम गर्दैन । तर, अध्यागमन अधिकारीहरुले दूतावासको सिफारिश भएपछि र यात्रा गर्ने व्यक्ति नेपालमा एमआरपी बनाएर फर्किने कुराको जानकारी आधिकारिक रुपमा आएपछि मात्रै जान दिने गरेको छ ।” पाण्डेले भन्नुभयो । यसैगरी पाण्डेले दूतावासमा एमआरपी बनाउनेहरुको चाप यतिबेला निकै कम भएको पनि बताउनुभयो । “व्यवस्थित रुपमा हामीले एमआरपी आवेदन दिएकाहरुको पासपोर्टको विवरण वेवसाईटमा हालिदिएका छौं । पासपोर्ट बनिसकेपछि दूतावासमै आएर तथा हुलाक मार्फत पनि वितरण कार्य अघि बढेको छ”, पाण्डेले भन्नुभयो । यसका साथै एनआरएन लगायत अष्ट्रेलियाका विभिन्न शहरमा रहेका महावाणिज्यदूतको कार्यालयहरुको सहकार्यमा पनि पासपोर्ट वितरण गरिएको छ । यसै सिलसिलामा एनआरएन न्यूसाउथवेल्सको संयोजनमा आगामी साता फेब्रुअरी २७ तारिखका दिन सिड्नीको हष्र्टभिलस्थित सिभिक थियटरबाट एमआरपी वितरण गर्ने भएको छ । यसैबीच दूतावासले नेपालमा पर्यटन प्रबद्र्धनका लागि यहाँको समूदायमा विभिन्न कार्यक्रम गर्ने योजना बनाइरहेको समेत पाण्डेले बताउनुभयो ।