नेपालमा फरक प्रकारको नयाँ राजनीतिक दल खोल्ने उद्देश्यका साथ सुरु गरिएको नयाँ शक्ति अभियानको ओसेनिया क्षेत्रीय संयोजक पदमा समिम अनवर नियुक्त हुनुभएको छ । नयाँ शक्ति अभियानको विदेश विभागले अनवरलाई क्षेत्रीय संयोजक बनाउने निर्णय गरेको हो । एनआरएन गतिविधिमा संलग्न अनवरले एमएनटीभीसँग कुरा गर्दै देशको सेवा गर्ने आफ्नो उत्कट अभिलाषाअन्तर्गत नै नयाँ शक्ति अभियानमा सम्मिलित भएको बताउनुभयो । अनवरका अनुसार यो स्वयंसेवी कार्य हो । “देशमा परिवर्तन गर्ने अभियानमा मेरो पूर्ण समर्थन रहन्छ साथै म पनि यस अभियानलाई यस क्षेत्रमा पर्ने देशहरुमा अघि बढाउन महत्वपूर्ण भूमिका निर्वाह गर्नेछु”, अनवरले भन्नुभयो । हाल एनआरएन अष्ट्रेलियाको वाक फर वेलफेयरको राष्ट्रिय संयोजक रहनुभएका अनवरलाई क्षेत्रीय संयोजक तोकेकोमा नयाँ शक्ति अभियान अष्ट्रेलियाले एक विज्ञप्ति प्रकाशित गर्दै स्वागत गरेको छ । प्रवक्ता रेखा न्यौपानेले जारी गरेको विज्ञप्तिमा अनवरलाई स्वागत गर्दै नयाँ शक्ति अभियानको विधानभित्र रहेर अभियानका लागि गरिने हरेक प्रगतिशिल कार्यहरुमा साथ र सहयोग रहने प्रतिबद्धता व्यक्त गरिएको छ । यसैबीच, नयाँ शक्ति अभियान ओसेनिया क्षेत्रीय संयोजक अनवर तथा अष्ट्रेलिया संयोजक विनोद पौडेलले संयुक्त विज्ञप्ति जारी गर्दै बेल्जियमको राजधानी ब्रसेल्समा भएको बिस्फोटको घटनामा दुःख व्यक्त गरेको छ । ब्रसेल्समा रहेका नेपालीहरुलाई सुरक्षामा विशेष ध्यान दिन पनि आग्रह गरिएको छ ।