गत महिना सिड्नीको अबर्नमा भएको सडक दुर्घटनामा ज्यान गुमाएका १७ महिने बालक श्रेयनको मृत्युको कारण चालकको लापर्वाही भएको भन्दै प्रहरीले मुद्दा दायर गरेको छ । स्थानीय बरउड अदालतमा कारकी चालकलाई आगामी २५ जुलाईमा उपस्थित गराइने भएको छ । यससँगै उनको चालक अनुमति पत्र पनि हाललाई स्थगित गरिएको छ । यस मुद्दामा नेपाली परिवारको तर्फबाट लडिरहेका सोलिसिटर एवं एनआरएनका पूर्व सचिव भरत पोखरेलले यसअघि बालक नै हजुरआमाको हात छुटाएर सडकमा पुगेको भन्ने अर्को पक्षको मतलाई गलत सावित गरेको बताएका छन् । सँगै रहनुभएकी हजुरआमा मेनुकाले तत्कालै अंग्रेजीमा सबै कुरा बताउन नसक्दा स्थानीय मिडियाहरुले यस विषयलाई त्यसै रुपमा प्रस्तुत गरेका थिए । तर, परिवारले निरन्तर प्रतिवाद गर्दै आएको थियो । आफुसँग सडक पेटीमै हिंडीरहेको नाति गुमाउँदाको पीडाले हजुरआमा मेनुका बोल्न सक्ने अवस्थामा थिइनन् । ड्राईभरमाथि यस किसिमको आरोपसहितको मुद्दा दर्ता भएपछि परिवारलाई राहत मिलेको छ ।