११ वर्षीया तनुजाको हत्यारा भारतमा पक्राउ
झापाको शान्तिनगर–१ की ११ वर्षीया तनुजा कोइरालाको हत्यामा आरोपित एक व्यक्ति पक्राउ परेका छन् ।
झापाको बुधबारे–५ स्थित मामाघरमा आएकी तनुजाको गत साउन ५ गते सुतेकै स्थानमा हत्या भएको थियो ।
तनुजाको हत्या अभियोगमा झापाको मेचीनगरमा डेरा गरी बस्ने ३५ वर्षीय राजकुमार राजवंशी पक्राउ परेको इलाका प्रहरी कार्यालय काँकडभिट्टाका प्रहरी नायब उपरीक्षक श्याम अधिकारीले जानकारी दिनुभयो ।
घटनापछि फरार रहेका अभियुक्त राजवंशीलाई नेपाल प्रहरीको टोलीले भारतको उत्तर प्रदेशस्थित नन्दीपुरमा लुकीछिपी बसिरहेको अवस्थामा पक्राउ गरेर आजै नेपाल ल्याएको हो ।
यसैबीच, कोइरालाको हत्यारालाई तत्काल सार्वजनिक गर्न माग गर्दै मेचीनगरका महिलाहरुले बृहत -याली निकालेका छन् । रासस
