इथियोपियाको एक जेलमा आगलागी हुँदा २३ कैदीको मृत्यु
इथियोपियाको एक जेलमा आगलागी हुँदा २३ जना कैदीको मृत्यु भएको छ । सरकार विरोधी प्रदर्शनकारी राखिएको जेलमा आगलागी भएको हो ।
२१ जनाको आगलागीका कारण जेलभित्रै निसास्सिएर तथा दुई जनाको भाग्ने क्रममा ज्यान गएको इथियोपिया सरकारले जनाएको छ । तर केही स्थानीय सञ्चार माध्यमले भने जेलका सुरक्षाकर्मीले गोली हानी कैदीको हत्या गरेको बताएका छन् । ज्यान गुमाउने कैदीको परिचय खुलाइएको छैन ।
राजधानी एडिस अबाबाको बाहिरी क्षेत्रमा रहेको जेलमा आगलागी भएको सरकारी अधिकारीले बताएका छन् । जेलबाट गोली चलेको आवाज पनि सुनिएको स्थानीय सञ्चार माध्यमको भनाई छ । इथियोपियमा पछिल्लो केही महिनादेखि सरकार विरोधी प्रदशर्न हुँदै आएको छ ।
