सशस्त्र प्रहरीको एपीएफ टिम सहारा सुरुङ्गा गोल्डकप फुटबलको फाइनलमा प्रवेश गरेको छ ।

झापामा जारी प्रतियोगिताको बुधबार भएको खेलमा अर्को विभागीय टोली नेपाल पुलिस क्लबलाई टाइब्रेकरमा पराजित गर्दै एपीएफ फाइनलमा प्रवेश गरेको हो ।

निर्धारित समयमा दुवै तर्फबाट गोल नभएपछि खेलको निर्णय टाइबेकरबाट भएको थियो । जसमा एपीएफले पुलिसलाई ५–४ गोलअन्तरले पराजित गरेको थियो ।

एपिएफका नवीन लामा, आदित्य चौधरी, मिलन राई, पासङ लामा र रञ्जन विष्टको प्रहार गोलमा परिणत भयो । पुलिसका विक्रम धिमाल, दिनेश गुरुङ, तेज तामाङ र दिनेश राजवंशीले गोल गरे भने बुद्ध लामाले पोष्ट बाहिर प्रहार गरेका थिए ।

बिहीबार रुपन्देही–११ र मनाङ मस्र्याङ्दीबीचको खेलमा विजयी हुने टोलीसँग एपिएफले फाइनलमा प्रतिष्पर्धा गर्नेछ ।

खेलमा उत्कृष्ट प्रदर्शन गरेका एपिएफका राजेन्द्र रावल म्यान अफ म्याच घोषित भए ।