नेचुरल बडी बिल्डिङ फिटनेस प्रतियोगितामा तीन मेडल जित्न सफल प्रकृति श्रेष्ठले आफुलाई नेपाली हुनुमा गर्व रहेको बताएकी छिन् । विश्वस्तरको प्रतियोगितामा यस्तो सफलता हासिल गरेपछि एमएनटीभीसँग प्रतिक्रिया दिँदै उनले भनिन्, “सैयौं मानिसहरुको बीचमा नेपाली झण्डा फहराउँदै उपाधि हासिल गर्नु वास्तवमै खुशीको क्षण थियो । हामी विभिन्न सिलसिलामा विश्वका जुनसुकै कुनामा रहेपनि आफ्नो उद्गमस्थल, मातृभूमि विर्सन सक्दैनौं ।” प्रकृतिलाई बडीबिल्डिङमा तालिम दिएका प्रशिक्षक सन्तोषकुमार श्रेष्ठ पनि आफ्नो लागि यो क्षण जीवनकै अविस्मरणीय रहेको बताउँछन् । उनी भन्छन्, “कुनैपनि नेपाली चेलीले विश्वस्तरको प्रतियोगितामा यस किसिमको सफलता हासिल गरेर ईतिहास कायम गर्दा खुशी नहुने को होला र ? मलाई पनि स्वाभाविक रुपमा उनको सफलतामा खुशी छ ।” सिड्नी निवासी नेपाली प्रकृति श्रेष्ठले लस भेगासमा सम्पन्न आईएनबीए पीएनबीए नेचुरल ओलम्पिया च्याम्पियनशिपमा तीन मेडल जित्न सफल भएकी हुन् । उनले ३० वर्षमाथिको स्पोर्टस मोडल विधामा गोल्ड मेडल जितिन् भने ओपन स्पोर्टस मोडल वल्र्ड विधामा रजत पदक र प्रोफेसनल ओपन स्पोर्टस मोडल विधामा कास्य पदक जितेकी हुन् । नेचुरल स्पोर्टसको विश्वस्तरको प्रतियोगितामा यस किसिमको जीत हासिल गर्ने प्रकृति पहिलो नेपाली खेलाडी हुन् । प्रतियोगिता गत नोभेम्बर १० देखि १२ तारिखसम्म सञ्चालन भएको थियो । यस प्रतियोगितामा ५० भन्दा बढी देशका खेलाडीहरु सहभागी थिए । बडी बिल्डिङ र फिटनेसमा कुनै औषधिको प्रयोग विना नै व्यायामको माध्यमबाट शारीरिक सुगठनको विकास गर्ने कार्य नै नेचुरल बडी बिल्डिङ फिटनेस हो । यसअघि प्रकृति हँगेरीमा सम्पन्न भएको विश्व च्याम्पियनशिपमा पाचौं भएकी थिइन् ।