न्यूज २४ टेलिभिजनको कार्यक्रम सिधा कुरा जनतासँगका चर्चित प्रस्तोता रवि लामिछानेसहित तीन जनालाई प्रहरीले अबेर गरी अदालतमा पेश गरेका कारण बयान नसकिएका कारण थुनामा पठाइएको छ । प्रहरीले पक्राउ गरी एक पटक थप गरी १० दिन थुनामा राखेर तयार पारेको अभियोगपत्रका साथ अदालतमा लगेपनि सुरुमा अस्मिता कार्कीको बयान गराइएको र बयानपछि कार्यालय समय सकिएका कारण सोमबार विहान १० बजेका लागि समय तोकिएको हो । 

लामिछानेको रिहाईको माग गर्दै शान्तिपूर्ण रुपमा चितवनको चोकमा जम्मा भएका उनका समर्थकहरुको भीड बढ्न थालेपछि र नारा उग्र बन्न थालेपछि प्रहरीले अश्रुग्याँस प्रहार गरी भीडलाई तितरवितर पारेको थियो । सालिग्राम पुडासैनीले मृत्युअघि भिडियो रेकर्ड गरी आफ्नो मृत्युको कारण रवि लामिछाने र युवराज कँडेलका साथै प्रेमिका अस्मिता कार्की भएको बताएका थिए । प्रहरीले अदालतमा पेश गरेको मुद्दामा तीनैजनालाई दुरुत्साहन मुद्दा लगाइनुपर्ने र हदैसम्मको कारवाही गरिनुपर्ने माग छ । उनीहरुले मिलेमतोमा पुडासैनीलाई मर्न बाध्य तुल्याएको प्रहरी अभियोगपत्रमा दावी छ । यसका लागि ५० हजार जरिवाना र ५ वर्ष कैदको माग गरिएको छ । गत शुक्रबारदेखि केही छापाहरुले पुडासैनी र अस्मिताको सम्बन्धका विभिन्न विषय सार्वजनिक गरेका छन् जसमा उनले यौन र मानसिक दबाब दिएर अस्मितालाई विवाह गर्न दबाब दिँदै आएको लेखिएको छ । दुईबीचको सार्वजनिक गरिएका एसएमएसहरुमा यस्तो संकेत मिलेको बताइएको छ ।

अर्कोतर्फ निजहरुले शनिबारको दिन बस्नका लागि प्रयोग गर्ने घर समेत फेला परेको छ । दुई महिनादेखि भाडा नतिरिएको अवस्थामा फेला परेको घरका मालिकले आत्महत्या गरेको पत्रकार आफ्नो घरमा बसेको बताएपछि प्रहरीले गएर मुचुल्का उठाएको थियो भने कागजपत्र र फोटोहरु लिएर गएको थियो । प्रहरीले त्यहाँबाट एक युवतीसँग बसेको पुडासैनीको फोटो, सुन किनेको बिल, एउटा लोबेड लगायतका सामग्रीहरु रहेको जनाएको छ । फोटोमा भएकी युवती अस्मिता नै हुन् वा अरु कोही थिइन् भन्ने प्रहरीले खुलाएको छैन । यसअघि दिपकराज गिरी लगायतका कलाकारहरुले शनिबार काठमाडौंमा पत्रकार सम्मेलनको आयोजना गर्दै रवि लामिछानेमाथिको अनुसन्धान छिटो सकाएर थुनामुक्त गर्न माग गरेका थिए ।