एजेन्सी । बेलायतका राजकुमार ह्यारी र मेघनलाई पुत्री लाभ भएको छ । राजपरिवार छोडेर अमेरिकाको क्यालिफोर्नियामा बस्दै आएका ड्युक र डचेज अफ ससेक्सले आफ्नो दोस्रो बच्चा छोरीको जन्म भएको जानकारी गराएका छन् ।

उनीहरुले आफ्नो छोरी लिलीबेट लिली डायना माउन्टबेटन–विंडसरको जन्म अमेरिकाको क्यालिफोर्नियास्थित सेन्ट बार्बरा अस्पतालमा भएको जानकारी दिएका हुन् ।

ह्यारी र मेघनले जारी गरेको विज्ञप्तिमा बच्चा र आमा दुवैको स्वास्थ्य राम्रो रहेको उल्लेख गरिएको छ । दुवैले छोरीको नाम लिलीबेट राजपरिवारकी महारानी तथा जिजु हजुरआमाको निकनेमको आधारमा राखेको तथा बिचको नाम हजुरआमा डायनाको सम्मानमा राखेको बताएका छन् । यसअघि २०१९ मा ह्यारी र मेघनले छोरा आर्चीलाई जन्म दिएका थिए ।