गठबन्धनको आज भरतपुरमा चुनावी सभा, शिर्ष नेताले सम्बोधन गर्ने
वैशाख २२, काठमाडौँ । सत्तारूढ गठबन्धनले आज चितवनको भरतपुरमा चुनावी सभा गर्दैछ। सभालाई गठबन्धनका शिर्ष नेताहरुले गर्ने कार्यक्रम रहेको छ।
सभालाई प्रधानमन्त्री एवं नेपाली कांग्रेसका सभापति शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ र एकीकृत समाजवादीका अध्यक्ष माधवकुमार नेपालसहितका नेताहरूले सम्बोधन गर्ने चितवन कांग्रेसले जनाएको छ।
सभामा सहभागी हुन प्रधानमन्त्री देउवा र कांग्रेस वरिष्ठ नेता रामचन्द्र पौडेल बुधबार नै चितवन पुगिसकेका छन्। भरतपुर महानगरपालिकाको मेयरमा गठबन्धनका तर्फबाट माओवादी केन्द्रकी रेणु दाहाल र उपमेयरमा नेपाली कांग्रेसका चित्रसेन अधिकारी उम्मेदवार छन्।
भरतपुरमा कांग्रेसका नेता जगन्नाथ पौडेलले स्वतन्त्र उम्मेदवारी दिएका छन् भने एमालेको तर्फबाट विजय सुवेदीको उम्मेदवारी परेको छ।
